Chief Minister Pu Lal Thanhawla chu nimin inrinni kha a pian champhaphak a ni a, kum 75 a tling ve ta. A pian champhaphak lawmpuia duhsakna hlantute zingah Prime Minister Dr. Mammohan Singh, Union Ministers thenkhat, AICC hruaitu mi pawimawh thenkhatte bakah, a thawhpui Minister-te, a thenrual tha leh laina chhungkhat te an tel a ni.

Vawiin hi International Museum Day a ni a, Mizoram ah pawh he ni hi hman a ni a. He ni puala programme vawiina Mizoram Art & Culture Department hnuaia awm Mizoram State Museum-in Museum Library-a an buatsaih chu Art & Culture Secretary Pu C. Thatkunga’n a hmanpui a. Programme hi Art & Culture Department Director Pu Ngurbiaka’n kaihruaiin sawmbik MUP Unit panga ten an telpui bawk a ni. International Museum Day lawmna chikhat atan vawiin nileng hian Museum hi hawn niin man chawi lovin a duh apiang tan tlawh thei a ruahhman a ni.

Pachhunga University College-a Sociology Department leh Psychology Department buatsaih ni hnih chhung awh National Seminar on Rethinking Social Change : Recent Trends and Emerging Perspectives chu vawiin tlai khan zawh fel a ni a. He national seminar-ah hian Mizoram chhung leh india ram hmun danga mithiamte paper 23 zirho a ni a, thupui hrang hrang hmanga paper buatsaihtute leh a chhimtute hi college leh university zirtirtute leh research scholar-te an ni a. Organizing Chairman Dr. R. Lalthangliana chuan Resource person thenkhat khawchhia leh thlawhna turn theih loh vanga seminar-a rawn tel thei ta lo tlema zawng awm mahse tluang taka thupui pawimawh tak tak zirho leh zau taka sawiho a nih avangin a hlawhthlak a tih thu a sawi. He national seminar-ah hian ram chhunga hnam nun leh khawtlang nun inthlak danglam dan leh a kaihhnawih hrang hrangte zir a ni a. Chung zingah chuan Zu chungchang te, eizawnna leh hnam zia te, inneih chungchang te, media leh sumdawnna te zirho a ni.

Tun thla tir lam khan NABARD chuan thingtlang hmasawnna ruhrel programme - Rural Infrastructure Development Plan 19 na hnuaiah ‘Strengthening and Improvement of Chhumkhum to Chawngte Road (45.0 Kms) Rs. 5545 lakh’ chu an sanction a. He sum atanga RIDF loan assistance chu Rs. 4990.50 lakh a ni.

MIFCO Employees Association chuan tunhnai khan miharsate tanpui nan Rs. 5,000/- Chief Minister’s Relief Fund atan an chhunglut a. Chief Ministers’ office chuan MIFCO Employees Association chunga lawmthu sawina leh tangkai taka hman anih tur thu an chhuah a ni.

Vawiin chawhma dar 10:00 khan Health Directorate Conference Hall-ah Ist Quarter (January - March,2013) chhunga Tuberculosis (TB) enkawl leh hmuhchhuah chungchangah Review Meeting neih a ni.

Directorate of Information & Public Relations leh Mizoram Arts Development Society tangkawp chuan 20 – 24 May, 2013 chhung hian Archives Hall, Babutlang-ah Art Workshop-cum-Seminar a buatsaih dawn a. Seminar ah hian Pu Isaac Malsawmtluanga, Venghnuai a miin lemziah lama hmasawnna tura pawimawh chungchang paper a present ang. He workshop-ah hian Aizawl mai bakah Mizoram hmun hrang hrang atanga lemziak thiamte an tel dawn a ni. He Art Workshop-cum-Seminar hi I & PR Secretary Pu C. Thatkungan a hawng ang.

Bamboo Development Agency (BDA) leh United Nations Industrial Development Organisation (UNIDO) tangkawp chuan Mau tangkai zawk leh eizawnna atana chhawrnaawm zawka hman anih theina turin, ni 15 - 20 May, 2013 chhungin ‘Devolopment of Prototype Products’ training Sesawng-ah a buatsaih a. He training-ah hian mau hmanga eizawng thin (artisan) mi 20 thlanchhuah niin, heng mite training pe tur hian Guwahati atangin mithiam an lo kal a ni. Training-ah hian thiamthil hrang hrang magazine rack, bamboo basket, bamboo lamp shades, etc. te siam zirtir an ni.

Ramhlun Market Building leh DLAO Office, Ramhlun North inkarah MIZOFED LPG Showroom thar chu nimin khan Cooperation Minister Pu J.H.Rothuama’n a hawng.

Pachhunga University College a Sociology Department leh Psychology Department tangkawpin ni 2 awh tura an buatsaih National Seminar on Rethinking Social Change : Recent Trends and Emerging Perspectives chu vawiin chawhma dar 9:30 khan tan a ni a. Seminar hi P.U.College Seminar Hall-ah neih niin Khuallian Dr. Tawnenga, Principal, P.U.College chuan seminar chhung hian thil pawimawh tak tak zir chhuak turin a chah.