Naktuk Inrinnni ni 14.8.2010 dar 1:05 pm atanga dar 2:00 pm inkarah All India Radio Aizawl Live Phone in hunah chuan tunlai tlang hrileng leh natna chi hrang hrang chungchang a zawh theih dawn a. In zawhnate chu Dr. Martin Vanlalfela Zadeng, MD (Medicine), Bethesda Hospital, Bawngkawn, Aizawl a miin  a rawn chhang ang. Telephone No. 2323515 leh 2323148 ah te a zawh theih ang.

Mizoram State Election Commission chuan Aizawl Municipal Council inthlan chungchangah a hnuai a mi ang hian thuchhuah a siam Zoram Thlirtu Nitin Chanchinbu August ni 12, 2010 issue-ah khan 'October 21, 2010-ah Municipal Council inthlan neih a ni dawn' tih thupui a hmangin Mizoram State Election Commission-in thuchhuah siam a October 21, 2010  zing dar 7 atanga tlai dar 4 inkar chhungin Aizawl Municipal Council Election neih a nih tur thu chhuah angin ziak a ni a. Chu mai bakah inthlan puan hun tur te, Notification chhuah hun tur te leh candidate-te hming pekluh hun leh inhnuhdawh hun tur te chenin ziak a ni. He thudik lo hi Women reserve seat thumvawrna tur chungchang State Election Commission Press Note tih chhuah nen mar takin Zoram Thlirtu Chanchinbu hian a ziah zawm a. A hrelo tan chuan thu diklo a ni tih han hriat chhuah hleih theih loh khawp a mamin a thil hriat leh State Election Commission-in Press Note a siam chu lak mar a ni a, a pawi khawp mai.

Independence Day vawi 64 na  AR Lammuala lawmna chu DDK Aizawl chuan zing dar 7:20 atangin Live in a pe chhuak dawn.

 July ni 30 2010 a I & PR Auditorium-ah inkhawm a Mizoram Education Reforms Commission in an Report  Chief Minister Pu Lal Thanhawla hnena an hlan chu Mizoram Sawrkar website www.mizoram.gov.in  ah a duh apiangte tan  zip file in  download thei a dah a ni e.

DDK Aizawl chuan August ni 13 (Zirtawpni) tlai dar 5 leh zan dar 7 inkarah Independence Day pualin Special Live Programme a tichhuak dawn a. Zaithiam hrang hrang in Hindi leh Mizo Ram ngaih hlate an sak bakah hnam lamte entir a ni ang a. War Veteran ten hun an hmang bawk ang.

Hmarchhak bial huap NERPC vawiin a Shillong a neihah Parliamentary Secretary to Chief Minister Pu Lal Thanzara chuan Mizoram in kawlphetha lama harsatna a neih mek leh a mamawh hrang hrang te tarlangin rawtna engemawzat a thlen.Parliamentary Secretary chuan Mizoramin kawlphetha a mamawh vanglai ber hunah chuan 100MW lai a ni a, chutihlaiin Mizoram bik atana bithliah chu 65MW chauh a ni a. Chutichung pawh chuan kawlphetha kan hmuh theih tlangpui chu 30-40MWchauh a ni a ti. Bairabi Thermal Plant, 22MW hmuh theih na tur a beisei sawi langin Pu Lal Thanzara chuan he khawl hmang tangkai tur hian a sum sen a san em avangin kawlphetha indaihloh zual phuhruk nan a thlaveng a hman ngam chauh a nih thin dan a tarlang a.

 Central sorkar hnuaia Raja Rammohun Roy Library Foundation (RRRLF) ngenna angin Library tana mi-thawhhlawk 'Father of Library Science in India' ti a hriat Dr. S.R.Ranganathan-a piancham 12th August chu Central sorkar-in ram puma "Librarians' Day" atana a puan angin Mizoram-a a vawi 1-na tan vawiin  dar 11:00  khan Art & Culture Department buatsaihin Chanmari YMA Hall-ah "Librarians' Day" hlawhtling taka hman a ni. 

Ni 12 - 13 August 2010 chhung hian MSACS leh UNICEF tangkawpin an buatsaih, Follow - up care for HIV exposed infants training chu Integrated Counseling and testing centre-a Medical Officer leh Counselor te tan Civil Hospital Auditoriumah neih a ni. He training opening session hi Pu Lalrinliana Sailo Health Minister, in a hmanpuia, Dr.P.Sangzuala, Mission Director, NRHM chuan a kaihruai. He opening session-ah hian Pu Lallianzuala, Consultant (UNICEF) chuan thusawiin - Mizoramah nu naupai kumtinin 22,000 - 26,000 vel awma hriat anih thu leh chung zinga HIV hluar dan chu za zel 0.8 anih thu sawiin heti anih chuan naupai 200 chuang chu kumtinin HIV kai an ni dawn tihna a ni a, nute hian enkawlna an dawn that loh chuan naute 100 chuang chuan HIV an kai tur thu leh chung zinga a tam ber chu kum 1 atanga kum 4 chhungin an thih mai tur thu a sawi bawk. Naupai zawng zawng ten HIV Counseling leh testing an dawn a pawimawhzia sawiin, nu nau hrisel nana, naute hnute  pek that leh hnute pek chungchang Counseling neih that a pawimawhzia sawiin,  heng hi ICTCa naupai an kal reng rengin Counselor ten an lo pek ve thu a sawi bawk.

Tunlai hian SMS leh e-mail hmanga mipui bum a sum tam tak chhuhsak ching an awm a. Sum tam tak man anga sawiin chumi la chhuak tur erawh chuan engemaw zat sen ve a ngaihthu te hriattirin in bumna thu thang a awm fo thin a ni. Hemi avang hian mi engemaw zatin bank leh hmun dangah sum an dah luh phah thin tih pawh hriat a ni. Hetiang inbumna thil hi Reserved Bank of India chuan ngaimawhin mipui mimir te hnenah fimkhurna chungchang zirtirna puanzar a duh ta hial a, chuvangin hetiang chungchang in hrilh hriatna neih a tum a. Mipui mimir a bikin Media mite chu he zirhona ah hian tel ngei turin a sawmin  a beisei a ni. He in hrilh hriatna hi August 18,2010 chawhnu dar 4:30 pm ah Circuit House Guwahati ah neih a ni ang.