Site Last Updated: 23rd September 2014, 5:07 PM

CHAPCHAR KUT - 2012 SAIHA ROPUI TAKA HMAN A NI

Vawiin chawhma dar 11:00 khan District Playground, Saiha-ah Chapchar kut 2012 chu ropui taka hman a ni.

He Kut lawmna inkhawm hi Pu H.Lalhmingthanga SDO(S), Saiha District chuan a kaihruaia, Kut hawnna hla Joint YMA Saiha ten an sak zawh hnu ah Kut-Pa Pu T.Rothanga chuan Kut puanzar pawt pharh in thuchah a sawi zui nghal a, Chapchar Kut hlimawm tak kan thleng leh thei chu lawmawm a tih thu leh Chapchar Kut lo chuah dan te leh hmanlaia  Kut an lawm thin dan te tarlangin Kristian kan nih tawh avanga kan Kut hman dan te pawh a danglam tawh dan thu a sawi a, kan hnam nun leh zia rang te chawinung zela kan Kristian-na mil a Kut pawh kan hman thiam deuh deuh a pawimawh thu a sawi bawk. Chapchar Kut hlim taka hmang theuh turin Kut chhimtu zawng zawngte duhsakna a hlan a ni.

Kut ni hian Pu C.Sangmanga, New Saiha chuan Hlado chhamin Tlang a tlir a, Saiha khawpui chhunga Primary School hrang hrang  naupang ten hmanlai nuaupangte infiamna “Pawnto” hmuhnawm tak an entira, Hnam incheina M.H.I.P, M.CH.P, L.W.A ten an entir bakah Y.M.A leh Y.M.A chhang Meisatla Branch te leh Y.L.A ten Hnam Lam an entira, Programme karlakah zaithiam hrang hrangte zai ngaihthlak a ni a, a duh apiangte tan Chai-lam hun hawn a ni bawk. Chapchar Kut lawmna-ah hian Miss leh Mister Chpchar Kut 2012 thlan an ni a, Miss Chapchar Kut atan Nula S.Siamkungi, New Saiha leh Mister Chapchar Kut atan Tv.  Joseph Vanlalhriata, Meisatla-te chu thlan an ni.

Pu Dr Chawngkhuma Chawngthu chuan kalkhawmte hnenah lawmthu sawina neiin Kut lawmna-a Item hrang hrang nei te hnenah lawmman sem zui nghal a ni a, lawmman te hi Pu. FC.Zase, Chairman M.A.D.C. Saiha chuan a sem a ni.

Written by N. Vabeiratlua MIS, IPRO Saiha DATED: 2nd March 2012, 5:08 PM | LANGUAGE: MIZO