Site Last Updated: 02nd September 2014, 4:49 PM

CHAPCHAR KUT 2012 TAN INPUAHCHAHNA KAL ZEL

Vawiin khan Art & Culture Minister Pu P.C.Zoramsangliana hovin Chapchar Kut 2012 Organising Committee an thukhawm a, Kut hmanna tura thil pawimawh hrang hrang an sawiho a ni.

Minister chuan Aizawl Sipai Lammuala Chapchar Kut hman a nih theih nan, Chief Minister hmalakna zarah astro-turf khuh nan tarpauline pawh Mizoram State Sports Council-in an chah mek chu lawmawm hle a ni a ti a. Kut Organising Committee pawhin Chief Minister hmalakna chungah nasa takin lawmthu an sawi nghe nghe a ni. Kumin Chapchar Kut chu Lammual-ah hman a ni ang a, phullem phah venhim nan tarpauline-in khuh a ni dawn a, amaherawhchu Kut hmang tura mipui lo kal zawng zawngte chu fimkhur leh felfai taka ground chhungah khawsa turin Committee chuan a ngen bawk a ni.

March ni 2 khian Chapchar Kut rualin Lawngtlai District-ah Lai hnam kut ‘Hlukhla Kut’ chu hman tura rel mek a ni a. Minister chuan Lawngtlai District-ah Chapchar Kut a vawi khatna atana an hmang ve tur chu Mizoram District tinah he Kut ropui hi a ruala hman kim a ni dawn ta a ni tih sawilangin, a lawmawm hle a ni, a ti bawk.

Kumin Chapchar Kut hmanna ropui ber Aizawl Sipai Lammual-ah kumdang ang bawkin Mizo hnam zerang pholang thei, lam leh zai bakah tunlai zaithiam lar ber ber ten hun an hmang dawn a. Mister & Miss Chapchar Kut 2012 pawh thlan a ni dawn a, hemi atan hian YMA Branch tin atangin nula leh tlangval thlanchhuahte an tel dawn a ni. Mizoram bakah Assam, Nagaland, Manipur leh Meghalaya atangin lam leh hnam incheina lantir a ni dawn a. Naupang leh Hranghlui Mizo incheia inchei te inlanna hun siamsak an ni dawn bawk a ni.

Chapchar Kut Organising Committee chuan he Kut ropui leh hlimawm tak hmang turin mi zawng zawng a sawm a, kumdanga Kut chhim ve lote pawh kumin Chapchar Kut-ah hian tel ve ngei turin a sawm a ni.

Written by Mina Zoliani MIS, IPRO DATED: 16th February 2012, 3:52 PM | LANGUAGE: MIZO