Site Last Updated: 23rd April 2014, 4:39 PM

CHIEF INFORMATION COMMISSIONER THAR PU LAL M. DINGLIANA

 Pu Lal M. Dingliana, IFS (Rtd) chu vawiin khan Raj Bhawan a inkhawm tawi leh urhsun taka buatsaiahah Mizoram State Information Commission a Chief Information Commissioner (CIC) thar atan Larsap Lt. Gen (Rtd) MM Lakhera chuan rinawmna thutiam neih tirin a la lut.

Pu Lal M. Dingliana (Pu Dingtea) hi Mizoram Board of School Education President hlui Pu Lal Chungnunga leh Pi Sapsiami te inkarah 1952 khan a lo piang a. 1974 khan Hindu College, Delhi University atangin MA (Pol. Sc.) zovin hemi kum vek hian UPSC exam kaltlangin Indian Foreign Service (IFS)-ah a lut a,  Ministry of External Affairs, New Delhi-ah a hna hmasaber a zawm a ni. IFS a nih chhung hian India ram tana palai hna thawkin khawvel hmun hrang hrangah a awm kual a. USSR (tuna Russia ram nita). Ethiopia, Germany, Afghanistan, Australia, Ireland, Slovak Rebpublic, Namibia, Bulgaria, Republic of Macedonia, Bulgaria leh Venezuela-ah te hna pawimawh tak tak chelhin a awm tawh a. Slovak Republic, Bulgaria leh Venezuela ramah te hian India Ambassador hna chelhin Namibia-ah 2000-2003 inkar kan Indian High Commissioner hna a chelh a ni.

IFS anga a hna chelh hnunhnung ber, Ambassador of India to Venezuela hi October ni 23, 2009 khan chelh tanin Carribean tuipuia thliarkar thenkhat Curacao, Aruba, Sint Maarten, Bonaire, Sint Eustatius leh Saba-ah te Consul General of India nihna pek a ni bawk. IFS hna a chelh chhung hian ram tan hna chhuanawm takin a thawk a, Venezuela a Ambassador a nih chhung hian Venezuela Oil Company PDVSA leh India rama Oil company thenkhat te inkara Joint Venture Agreement ziahfel chu a hmalakna a puitlin a ni.

CIC lakluhna inkhawmah Chief Minister Pu Lal Thanhawla leh a thawhpui Minister leh Parliamentary Secretary te, MLA, Political Party hrang hrang hruaitute leh sorkar mi pawimawh engemawzat an tel a ni.

Pu Lal Dingliana hian a office thar luah nghalin Dawrpui Pastor bial vawngtu Pastor Vanlalnghaka chuan amah leh a office thar chu Pathian hnenah tawngtaiin a hlan a. Pu Dingtea chuan kum 36 India ram tana a thawh tawh hnuah Mizoram sorkar hotute duhsakna dawnga Mizoram mipuite tana a theihna hman theihna tur hun tha an siamsak chu lawmawm a tih thu sawiin theihtawpa ram, sorkar leh mipui tana thahnemngai taka thawk turin he a hna thar hi a zawm thu a sawi a. Chanchinbumi te, sorkar leh mipui te tawiawmna a ngen a ni.

Written by Lalnunmawii MIS, IPRO DATED: 8th August 2011, 2:00 PM | LANGUAGE: MIZO