Site Last Updated: 01st September 2014, 6:59 PM

DARLAWN KHUAA IN KANG TANPUINA SPORTS MINISTER HOVIN HLAN A NI

Vawiin chawhnu dar 2:00 khan tun hnaia Darlawn khuaa kangmei avanga in leh lo chante tanpuina atana Mizoram Sports Association (MCA)-in sum an thawhkhawm Rs 16,600 chu bialtu MLA Pu R.L. Pianmawia kutah Sports Minister Pu Zodintluanga chuan MCA aiawhin a hlan a. He hunah hian Mizoram Chess Association hruaitute chu an President Pu Rochhunga Ralte hovin an tel a ni.

Pu Zodintluanga chuan, “Mizoram Chess Association-in tanpui ngaite tanpui nachang an hria hi an chhuanawm hle a; anmahni chanpual Chess infiamna kawnga naupangte an kaihhruai dan pawh hi sports association dangte tana entawntlak a tling a ni” a ti a. 9th-18th February, 2012 chhunga MCA huaihawta Catch Them Young programme hnuaia coaching neih zawh tak chu Mizoram-a Chess infiamna chanchina mel-lung pawimawh a nih thu sawiin, “Bangladesh atanga chess zirtir tura lokal Grandmaster Niaz Murshed khan India ram leh khawvel huap pawha hming lang thei tura beiseiawm leh chher hriamtlak Mizo naupang 3 a rawn hual nghal pang kha a ropui a. hetiang hian Sports Association hrang hrangten hian chher hriamtlak khawpa naupang talent nei tha bik rawn thur chhuak zel se la, anmahni enkawl dan tur chu sawrkarin a buaipui chhunzawm dawn a ni” Pu Zodintluanga chuan a ti. Tuivawl bialtu MLA Pu R.L. Pianmawia chuan Mizoram Chess Association inpekna chu ropui a tih thu sawiin, darlawn khawtlang aiawhin thilpek petute hnenah lawmthu a hrilh a ni.

Vawiin chawhnu dar 2:30 khan Sports Minister Pu Zodintluanga chuan Mission Veng, Kawltheihuan hmuna Deputy Commissioner, Land Revenue & Settlement pisa thuthmun ni thin, Sports Department enkawlzui tur chu a tlawh nghal a; Sports Department Special Secretary Pu R. Lalvena leh Pu Zirmawia, Sports Director te bakah Revenue Department aiawhin Pi Vanlalrovi, Deputy Director ten an tawiawm a. He hmunhma hi Sports Department chuan changtlung taka cheibawl a tum a; kut thlak zel dan tur chungchangah department pahnihte chu inremna lo siam turin thu an hnutchhiah a ni.

Written by Robert Thangmawia MIS, IPRO DATED: 28th February 2012, 4:28 PM | LANGUAGE: MIZO