Site Last Updated: 28th November 2014, 5:49 PM

FOREST MINISTER LEH NATIONAL BAMBOO MISSION (NBM) HOTUTE INKAWM

Vawiin khan Environment & Forest Minister Pu H. Rohluna chuan National Bamboo Mission, Government of India, New Delhi atang lo kal Kameshwar Ojha, Dy. Director General, NBM, Ministry of Agriculture chu a office ah kawmin Mizoram mamawhte a sawipui. Pu H. Rohluna chuan mau chin leh Industry hmasawn nan Mizoram sum leh paia rawn duhsak turin a ngen bakah officer te ram pawn a training neih dan tur te, nasa zawka mau hman tangkai dan tur te, a bik takin Thingzai hmanga Kuang kan siam thin hi mau hmanga thlak dan tur leh Mau Plantation zau zawk siam dan turte a lo sawipui a ni.

Ni 4 chama lo zin Pu Ojha hian Mau Plantation leh Industry hmalakna chi hrang a rawn enfiahna chu hlawhtling hle a a hriat thu sawiin Mizoram chu theihtawpa tanpui zel a tum thu Minister hi a hrilh a ni. Pu Ojha hi Mizorama a cham chhungin Pu Lalthangliana Murray, IFS, Mision Director, NBM, Forest Officer leh Industry Officer ten tawiawmin ramhnuaiah te an kalpui a, hna a en chipchiar hle a ni.

Pu Ojha hi naktuk ah New Delhi ah a haw leh ang a, haw kawngah Forest Department hmalakna leh Venus Bamboo Industry te a tlawh leh dawn a ni.

Written by Lalnunmawii MIS, IPRO DATED: 20th April 2012, 2:09 PM | LANGUAGE: MIZO