Site Last Updated: 23rd October 2014, 5:43 PM

PU CHAWNGTINTHANGA’N HSLC 100 % PASSED LAWMPUI

Nimin ni 24.5.2012 (Ningani) khan Parliamentary Secretary, School Education Pu Chawngtinthanga chuan a bial chhung Khanpui Adhoc Aided High School atanga HSLC 2012 result-a za a za passed lawmna ah khuallian niin a hmanpui.

Khuallian Pu Chawngtinthanga chuan HSLC passed tharte lawmpuina leh fuihna thu sawiin hlim hlawp leh sahawk ni lova kan hlawhtlinna leh lawmna inhriatpuia kan inlawmpui thin chu a hlawhtlin tan inchona leh infuihna tha tak a ni a ti a. Mizoram sorkarin department hrang hrangah kan ram hmasawnna turin theihtawp chhuahin hma a la mek a, Education Department ah pawh kan ram zirna siamtha turin theihtawpa hma la in, Education Reforms Commission recommendation tihlawhtling turin a tahtawlin hma lak mek a ni a ti a, zirna siamthat na atan Zirtirtu tha neih a pawimawh hmasa ber a, chuvangin Zirtirtu lak tharah pawh sorkar chuan thiamna bakah quality a ngai pawimawh zel dawn a ni a ti. Zirlai passed tharte chu fuihin sualna leh thatchhiahna inrahbeh tir lova, hneh theih loh nun Pathianin a pek chu hmang tangkai thiam turin a chah bawk.

Pu Chawngtinthanga chuan Khanpui H/S hnenah lawmpui nan Steel Almirah, Volley Ball leh Net a pe a.

Khanpui H/S hi khawtlangin kum 1990 a an din a ni a, kum 2007 atang khan HSLC result ah 100 % passed nei tanin, kum 2009 atanga 2012 thleng khan kum 4 chhung 100 % an la passed zel a ni. Kumin 2012 hian zirlai 69 an nei mek a, khawtlang hruaitu, nu leh pa tangrualin inlungrual takin an enkawl a, Zirtirtu 7 an nei a, tun tum result an lawmah hian 1st Division ah 3, 2nd Division ah 4 leh 3rd Division ah 1 an passed a, zirlai 3 in Mizo subject ah letter an hmu a ni.

Written by Pratap Chhetri MIS, IPRO DATED: 25th May 2012, 12:44 PM | LANGUAGE: MIZO