Site Last Updated: 19th December 2014, 4:04 PM

PU LALRINLIANA SAILO AN PAWL 12 PASS TE PUALA LAWMPUINA PROGRAMME HMANPUI

Vawiin khan Health Minister Pu Lalrinliana Sailo chuan Khawzawl Vengthar Branch YMA Hall-a, MZP Headquarters Khawzawl in Khawzawl zirlai naupang Pawl 12 pass te lawmpuina leh chawimawina programme an huaihawt chu khuallian niin a hmanpui.

Pu Lalrinliana Sailo chuan zirlai naupangten rim taka harsatna hrang hrang paltlanga Pathian malsawmna dawnga Pawl 12 an passed chu a lawmpui thusawiin an kal zelna turah tuarchel taka engpawh hmachawn ngam a, theitawp chhuah turin a fuih a. Tha taka an passed chhan chu an inpekna anih rualin an nu leh pate inpekna leh an zirtirtute thahnemngaihna chu hai rual a ni lo a,  chuvangin an chhungte chu pek let ve tur an nei tih hre reng turin a chah.

Saptawng hman chungchang sawiin Health Minister chuan saptawng hi hlauh loh tur a ni a, tiin zirlai naupang kalkhawmte chu saptawng hmanna kawnga tim lova, an thiam ang ang hmang mai thin turin a hrilh a. Zirlai naupangte tan mahni inrintawkna neih a tul thusawiin timna nei loa, an zirna kawng zawh chho turin a fuih bawk.

Look East Policy in a ken tel Multi Modal Project a puitlin hunah Mizoram kaltlangin Asia khawmual Chhimchak (South East Asia) te nen insumdawn tawnna a lian hle dawn a tiin hemi atan hian tun atanga rilru leh hawiherh zau taka pu chunga thalaite inpuahchah a tul thu a sawi lang a. Zirlai naupang te chu sawrkar hnathawh chauh tinzawn loa, company a thawhte leh sumdawnna lamah te an rilru seng turin a chah bawk a ni.

He lawmpuina programme ah hian MZP Gen. Headquarters chuan zirlai Pawl 12 pass mi 47 an chawimawi a, thuziak leh thilpek an hlan a. Heng zinga zirlai titha zual pathum – Malsawmdawngliana, H. Lalremruati leh K. Malsawmtluangi te hnenah Gold Award, Silver Award leh Bronze Award MZP in an buatsaih chu Pu Lalrinliana Sailo hian a hlan a, passed thar zawng zawng te hnenah JF Laldailova Dictionary a pe bawk. Heng Award pathum te hian citation mawi tak leh lawmman pawisa fai a keng tel a ni. Khawzawl Higher Secondary School in tui intur lama an harsatna neih sutkian anih theih nan ruahmanna siam a tiam a ni.

He programme-ah hian Khawzawl-a khawtlang leh tlawmngai pawl hrang hrang hruaitu te, zirlai naupang nu leh pate leh  MZP General Headquarters, Aizawl hruaitu te pawh an tel a ni.

 

Written by Pratap Chhetri MIS, IPRO DATED: 24th May 2013, 7:08 PM | LANGUAGE: MIZO