Site Last Updated: 23rd April 2014, 10:38 PM

PU S. HIATO’N NORTH VANLAIPHAI LEH EAST LUNGDAR TLAWH

Tourism leh PHE Department changtu Minister Pu S.Hiato chuan vawiin khan North Vanlaiphai leh East Lungdar te tlawhin heng khua a Tourist Lodge sak te chu a endik a. Pu S.Hiato hi Parliamentary Secretary Pu H.Zothangliana’n a tawiawm bakah Lai Autonomous District Council atangin Pu Lalneihkhuma EM(Education) leh Pu Chuanglura Adviser to CEM ten an tawiawm a, Mara Autonomous District Council Pu H.Sohlo leh K.Beisa Ex. EM; Pi A.Daozu Ex MDC leh Pu B. Dawpho Editor Saiha Post ten an tawiawm bawk a. Sorkar hnathawk tawiawmtute chu PHE Department Engineer-in-Chief Pu R.Lalfanliana; SE Pu Chawnghnuna leh PHE Department a officer dangte ; Tourism Director Pu Vabeiha Hlychho ; PWD EE Pu Lalnghinglova leh PWD officer te an ni.

North Vanlaiphai ah hian Pu S.Hiato leh amah tawiawmtute hi Information & Cultural Centre ah VCP Pu Pu Thanmawia Sailo hovin khawtlang hruaitute leh tlawmngai pawl hruaituten amah lawmna pualin inkhawm tawite an buatsaih a. Pu Hiato chuan N.Vanlaiphai chu khaw hmingthang leh khaw vannei,leilet hmun tha nei an nih thusawiin kawng hrang hrang a an hmasawmna chu lawmawm tiin tunhnaia N. Vanlaiphai in khawfai lawmman an dawng chu a lawmpui thu a sawi bawk a. Mizoram khaw hrang hrang tui lakna tur chu Sorkarin a ngaihtuah zela, mahse chutih rualin khawtlang pawhin tihtur an nei ve a, chu chu tui tlanna hmun ramngaw humhalh a ni a ti. Ramngaw tha tak neih hi khualzin hipna tha a nih thusawiin Minister chuan khualzin te thlenna hmun tur Tourist Lodge Mizoram hmun hrang hrang 17 lai ah hawn mai thei in a a awm tawh a ni a ti.

East Lungdar ah chuan Pu S.Hiato lawmna inkhawm hi Tourist Lodge Complex a neih a ni a, VCP Pu K.Lalngaihzuala chuan khawtlang aiawh in Minister leh a tawiawmtu te lawmna thu a sawi a. Pu S.Hiato chuan Tourist Lodge sak nan hmun tha tak leh zau tak mai khawtlang in phal taka an pe chu lawmawm a ti a. Sorkar Flagship Programme NLUP chungchang sawiin NLUP dawngtu zawng zawngte chu thahnemngai taka an trade thlan theuh ah rinawm taka thawk turin a fuih a. NLUP hman thiam loh leh hman sual erawh chu mahni inhremna a nih thu a sawi lang bawk a ni. Tui lakna tur reng reng atan ramngaw humhalh a tul tiin thing a tam thei ang bera phun thin turin mipuite a chah bawk. Pu H.Zothangliana pawhin thu a sawi bawk a ni.

North Vanlaiphai leh East Lungdar a Tourist Lodge sak zawh tawh te chu a en kual a, siamthat ngaite siamtha turin PWD hotute hi a hrilh nghal a. Heng Tourist Lodge pahnih te hi kumin October thla tir velah hawn beisei a ni.

East Lungdar Tourist Lodge Complex-ah hian Pu S.Hiato leh Pu H.Zothangliana te hian thing an phun nghal a. Vawiin vek khan Khawbung an pan ang a, naktuk khian Farkawn leh Zokhawthar-ah te Tourist Lodge sak tharte hawng tura beisei a ni.

Written by Pratap Chhetri MIS, IPRO DATED: 27th June 2012, 5:49 PM | LANGUAGE: MIZO