Site Last Updated: 28th November 2014, 5:49 PM

PU S.HIATO IN PHALHRANG, RAWMIBAWK & RIASIKAH COMPOSITE W.S.S. A HAWNG

Nimin (ni 2.4.2012) chawhma dar 10:00 Am khan  Pu S.Hiato, PHED Minister chuan Phalhrang khuaah Phalhrang, Rawmibawk & Riasikah Composite Water Supply Scheme a hawng. He Composite W.S.S. hi NRDWP (National Rural Drinking Water Programme)  fund atanga  Rs. 2,21,96,000/-seng a siam a ni.

He Composite Water Supply Scheme hawnna inkhawmah hian thusawiin, Minister chuan he lai tlangdunga chengten tui harsatna namen lo an tawh thin sutkiana a awm chu a lawm ber te zinga mi a ni, a ti. Sawi zelin Minister chuan Tui kang nghah nana an hun leh tha hlutak an sen thin chu, sen a ngai tawh dawn lo avangin, thil  dang leh hna dang buaipui nan pawh hun an neih tawhdawn a, chu chuan hmasawnna lamah ke a pen tir hlawm ngei a beisei thu a sawi lang bawk. Minister chuan tui thianghlim hnianghnar taka hman tur awmna khua a mihring chengte chu  an hrisel in,  an hmel te pawh a tha thin a , chu chu  helai tlangdunga khuate hmabak a ni, a ti bawk.

He Composite Water Supply Scheme  hian khawthum : Phalhrang, Rawmibawk leh Riasikah te chu Gravity Pipe hmangin a  chawm  dawn a ni. Tui hi Luilaklawh Lawngtlai District-a Lungpher khaw bula lui atanga lak niin, a khaw hnai ber Phalhrang khua nen hian 22.20km laia inhlat a ni.

Tui lakna atanga khaw hlaber Riasikah khua hi 38.70km a hla niin, Phalhrang leh Riasikah inkar hi 16.50km a hla  a ni.Tui hi GI pipe 50mm hmanga lak niin, thal lai leh nipui laia tuilakna hmuna tui luan chakdan chu 45litre/minute a ni. He tui hian nikhatah mipakhat hnenah  40litre zel pe in, mi 1800 chawm thei tura ngaih a ni.

Tuizem pakhat theuh khaw thum (3) ah hian dah niin, Phalhrang-ah Litre 38,880 dawng leh Rawmibawk-ah leh Riasikah-ah Litre 24,025 dawng ve ve dah a ni a. Khaw chhungah tui herchhuahna hmun(Public points) 5 theuh siamsak an ni bawk.

Written by N. Vabeiratlua MIS, IPRO Saiha DATED: 3rd April 2012, 10:34 AM | LANGUAGE: MIZO