Mizoram Legislative Assembly Speaker Pu R.Romawia chuan vawiin chhun khan a bial chhung Chaltlang North veng a tlawh a, khawtlang leh tlawmngai pawl hruaitute nen Local Council Chairman Pu R. Lalremtluanga inah inkawmhona hun te hmangin veng hmasawnna tur bakah an mamawh leh harsatna tawhte an sawihova, hmalak ngai leh bawhzui dan turte enfiahin hmun hrang hrang an fang kual nghal. Khawtlang hruaitute hmaa thusawiin Pu Romawia chuan tunhma lama ruahmanna fel awm tawk loh vanga khawpui chep taka kan inhnawh thin chuan veng tinah harsatna nasa tak a thlen mek thu a sawi lang a, mahni hamthatna tur ringawt ngaihtuah lova, khawtlang hlawk tlanna tur ngaihtuaha hma kan lak tlan a tul tak zet tawh a ni, a ti. Thalai thaza rualte tana infiamna hmun te pawh khawtlang hruaitute chuan an ngaihtuahsak a pawimawh thu te a sawi lang bawk. A hnena veng mamawh an lo thlen te chu Speaker chuan theihtawp chhuaha hma a lo lakpui tur thu a hrilh a ni. Speaker hi department officer thenkhat ten an tawiawm a ni.