Social Welfare Minister Pu PC Lalthanliana chuan khawtlang nun siamtha tur chuan chhungkua a bul tan a tul a, chhungkaw nun chhia leh kal fello in khawtlang nun a tichhia a ni, a ti a. Sorkar emaw kohhran emaw tlawmngai pawl te kutah khawtlang nun siamthatna hna hi a dah ngawt theih loh va, mitin mawhphurhna a ni, a ti a, a bul thut atanga siam tha a, chhungkua a nun dik inzirtirna uar deuh deuh a tul a ni, a ti.

He thu hi vawiina Vanapa Hall a HIV/ AIDS vei naupangte kalkhawmna leh AIDS vanga nun chan tawhte hriatrengna hun GIPA Alliance (Greater Involvement of People living with HIV/ AIDS) buatsaih "Get-together HIV/AIDS affected children and Candle light memorial service" a a sawi a ni a. Minister chuan hetiang hun hi Mizoramah hman ve ngailo se tih chu duhthusam a nih laiin hman a tul si chu lungchhiatthlak a tih thu a sawi a. He natna a rem theihna tur leh a tuartute tanpui tura mi inpe tak tak te thahnemngaihna chu fakin, Krista zirtirna a taka nunpuitu, Bible a Samari mitha ang kha an ni, a ti a. Inpekna leh hmangaihna thinlung pu a, he natna veitute enkawl piah lamah vei thar an awm lohna tura invenna uluk taka kalpui chu he natna do hnehna tur thil pawimawh a ni, a ti.

Mizoramah hian kumin March thla thleng a mi 1,40,664 thisen endik tawh zingah mi 5,543 chu HIV positive an ni a, mi 543 ten AIDS natna an vei mek a. Naupang 216 HIV positive awmin an zinga mi 58 chauhin ART (Anti Retroviral Therapy) enkawlna an la a ni. HIV/ AIDS veite enkawlna hmun ART Centre hi Champhai, Lunglei leh Aizawlah a awm a. Community Care Centre hi Durtlang leh Serkawnah a awm bawk. HIV positive mi 5.543 zingah ART Centre pan thin mi 3,585 awmin an zinga 35% te chuan chhan hrang hrang vangin he inenkawlna hi an la ve lo a ni.

He huna thusawitu dang MSACS Project Director Dr. Eric Zomawia chuan HIV/AIDS vei te enhranna leh hmuhsitna hi Mizoramah a reh theilo chu pawi a tih thusawiin he natna veitu tam takin ART Centre an pan lohna chhan pawh mi in an hriatchhuah a an thinhrik an hlauh vang a ni, a ti a. Hetih lai hian thenkhat inenkawlna la duh, mahse sum dinhmun harsatna vanga ART Centre panna tur neilo te pawh an awm bawk a. Mizoram sorkar chuan Mizoram State Transport Bus ah te a thlawna chuan phalna pe tawhin kawng hrang hrangah tan la mah se heng mi te harsatna sukiang tur hian sorkar kut chauha innghatlo a kohhran leh khawtlang ang te a tan tlan a tul tak zet a ni, a ti.

Vawiin programme-ah hian HIV/ AIDS vei naupangte sponsor tura intiamna (pledge) mi pasarih in an sign a. Pledge sign tu zingah hian Social Welfare Minister Pu PC Lalthanliana, MSACS Project Director Dr. Eric Zomawia leh MSACS Deputy Director Dr. Zothankhuma Chhakchhuak bakah Central KTP Leader Rev C Lalpiangthara te an tel a ni.