British rorelna atanga India ramin zalenna a hmuh champha vawi 64-na ram pumah ropui taka lawm a nih rualin Lawngtlai District-ah pawh Education Minister Pu Lalsawta hovin tukin zing dar 10:00 AM khan CYLA Playground, Lawngtlaiah Independence Day lawmna hun hman a ni a. Pu Lalsawta hian Independence Day parade chibai bukna chhang letin Independence Day puala Lawngtlai District chhunga intihsiakna hrang hrang lawmman te a sem nghal a ni.

Pu Lalsawta chuan zalenna a hmuh atanga kum 64 chhungin khawvel ram ropui zingah India a tel hman tih sawiin kan hmasawnna zinga langsar ber pakhat chu mi hausa leh mi rethei kar a lo zim ta leh zirna lama kan lo sang ta hi a ni a ti a. Kawng tinrenga hmasawnnaah khawthlang lam chauh ni lovin khawchhak lam hi khawvelin a lo thlir tan ta a, India pawh hi khawvel hian entawn leh thlirah a hmang tan der tawh a ni a ti bawk.

India sorkar “Look East Policy” avangin Mizoram hi khawchhak lehzual panna kawng a ni thuai dawn a, Lawngtlai khua pawh hi Multi Modal Transport Project vangin Mizoram chhim lam kawtchhuah lun tak a ni tawh dawn tiin hmasawnna lo dawngsawng turin Lawngtlai mipuite an lo inbuatsaih a ngai tih a sawi a. Hmasawnna avanga thil tha tamtak a thlen rualin kan beisei loh leh duh loh thil tha lo tam tak pawh a lo chhawm lut dawn a, heng hmachhawn tur hian Kohhran leh NGO te pawhin ngaihtuahna lo hman lawk a tul a ti bawk.

Mizoram sorkarin zirna te, infiamna te, kawlphetha siam chhuah belh leh retheite khai chhuah kawngah te nasa takin tan a la a. Heng hlawhtlinna hi mipui kutah a awm a; mipuiin duat leh hmangaih taka sorkar tawiawma an fin chhuah phawt chuan hmuingil takin kan kal thei ngei ang tiin rorelna fing leh tha nei tur leh khua leh tui tha ni turin mipuite a ngen a ni.

CYLA Playground, Lawngtlaia Independence Day champha vawi 64-na lawmnaah hian Lawngtlai District chhunga Sorkar hnathawk te, zirlai naupangte leh mipui an kal tha hle a. SSA Pipe Band, Lawngtlai ten Band Display entirin parade an kaihruai a. Parade Contingents 22 zingah Jehova-Jireh English School (Girls) te 1-na niin Govt. Region HSS te 2-na an ni a, 3-na chu  Jehova-Jireh English School (Boys) te an ni bawk. Independence Day puala Football Tournament buatsaihah Lawngtlai - III champion in Badminton Tournament Men’s Singles-ah Neil Lalfakzuala; Men’s Doubles ah Malsawmtluanga & Benjamin Lalhmingliana, Men’s 35+ Doubles ah Malsawmtluanga & Benjamin Lalhmingliana te an champion bawk.

Independence Day pual hian Lawngtlai khaw chhunga Hospital leh Motherless Home te tanpuina pek an ni a; tanpuina pe hian CDPO, CYLA, LWA, MHIP, MUP leh MJA te an kal a ni.

Attachment

  • Loading attachment...