Larsap Lt. Gen. (Retd) M.M.Lakhera, PVSM, AVSM, VSM chuan nimin khan New Delhi-a Russian Centre ah "INTERNATIONAL CONVENTION ON IMPACT OF GLOBAL CLIMATE ON AGRICULTURE" (Khawvel huapa Global Warming in Agriculture a nghawng dan zirhona chu khuallian niin a hawng.
Larsap chuan khawvel tilum zualtu (Greenhouse Gas) chi hrang hrang kan tihchhuah tam telh telh avangin thlai leh nungcha chi hrang hrangten an tuar nasa em em a, boruak a lum chak em em a, sik leh sa inthlakthleng dan pawh a danglam chak em em bawk a, lei tha a kalral nasain thlai leh mihring natna chi hrang hrang a pung chak em em bawk a ni a ti a, Tropical ram ho (e.g. India) hi a tuar nasa zual kan nih avang hian tan kan lak nasat a ngai hle a, a bik takin Agriculture a nghawng chhiat nasat loh nan lei tha ti hek si lova thlai chin dante kan uar thar a tul a ni a ti a, hmunkhawro leh ruahtui tlak tlemna hmuna awmte tan pawh ruahtui khawl a pawimawh zia thu a sawi bawk.

Larsap chuan India rama mipui vaibelchhe 114 zingah hmun li a thena hmun thum (75%) hian eizawnna atan Agriculture kan bel a, heng zinga 85% chu mirethei leh harsa tak tak eitur hrisel leh tha khamkhawp hmulo an nih avangin an damkhawchhuahna tur atan harsatna tam tak an tawk a, hetih lai hian science thiamna hmanga thlai chi thar (Genetically Modified Crops) hi tam zawka thlai thar chhuah  na atana tha tak ang a lang ni mahse;  loneitu rethei tak takte tan ban phak anih ve dawn loh avangin ngaihtuah ngun a ngai a, an hlawkpui theih dan tur ngaihtuah a tul hle a ni a ti a, hei bakah hian mihring hriselna a nghawng theih dan zirchian a la nih loh avangin innghahna atan chuan hman ala chi loh ani a ti  bawk.

Ram hrang hrang atanga kalkhawmte hmaah Larsap chuan tunah hian Mizoram chuan a mipuite hmasawnna atan ram leilung tichereu lo zawngin ruahmanna tha tak a siam thar a ni a ti a, heng zingah hian lo hal (Jhuming) chu lo neih dan chi dang tha zawka thlak tura ruahmanna siam anih bakah State pumpui 88.63% hi ramngaw (India ramah a sang ber) a ni chungin ramngaw siam belh zel an la tuma an entawntlak hle a ni a ti a, hemi tihlawhtling tur hian State Sawrkar chuan Policy thar "New Land Use Policy (NLUP)" a kalpui mek a ni a ti bawk.

 He Convention hi Bharatiya Krishak Samaj leh Russian Centre of Science & Culture tangkawpin an buatsaih a ni a, India rama Russia palai te, Central Sawrkar Minister leh MP te, ramchhung hmun hrang hranga loneitute bakah khawvel ram hrang hrang atangin mithiam tak takte an kalkhawm a ni.