Prime Minister Dr.Manmohan Singh a kaihhruaina hnuai a Chief Ministers Conference on Prices of Essential Commodities tih chungchang sawihova February ni 6, 2010-a New Delhi a neihah Chief Minister Pu Lal Thanhawla chu thusawitu pawimawhte zinga mi a ni a, 'phurh man to vangin phai lam aiin Mizoramah thil man a to zawk' a ti.

Pu Lal Thanhawla chuan thil mansang hian miretheite a nghawng na ber a. Mizoram chu hma la sawnlo tak leh tlangram chhengchhe taka awm kan nih avang hian ei leh barah kan intodelh loh thu sawiin, phai lam atanga kan chawk luhte pawh hi a phurh mante a san avangin a leitu kut a thlen meuh chuan kan khawpui Aizawlah ngei pawh phai ai chuan 10% aia tamin ato zawk daih thin a ni a ti a. Thingtlang khua athlen meuh phei chuan nasa takin ato belh tiin, hei hian ei leh bar lam venna kawngah tan lak ati harsa a ni a ti.

Chief Minister chuan ei leh bar lam nasa zawka dehchhuah ve duh mahila, kan ram leilungzia in a zir loh avangin thlai chin nana ram hmantlak a tam loh bakah lo vat mi kan nih avanga buh leh bal tam zawk dehchhuah a harsat thu a sawi a. Mumal taka ei leh bar kawnga kan lo intodelh theih nan a sorkar thar chuan New Land Use Policy hman tum anih thu sawiin, Prime Minister pawhin pawmsak tura a ngen nghal thu a sawi a. Hetih lai hian a sorkar chuan agriculture lam tih hmasanna tura Centrally Sponsored Scheme hnuaia peng 5 te chu bawhzui mek anih thu sawilangin Chief Minister chuan hemi atana Cheng vaibelchhe 32 leh nuai 72 ruahman chu hman fai vek a ni ang a ti.

Mizoram in chaw bera a neih buhfai hi FCI ah kan innghah tlat thu sawinawnin, Pu Lal Thanhawla chuan kum 2001 chhiarpui anga buhfai 3905 MT min pek mek hi tuna kan mamawh ang 8302MT a min tihpun sak tura ngenin, December leh January thla atan additional quota min siamsak bawk turin a ngen a. Chief Minister chuan  buhfai hi aman pangngaia kan lei laiin thingtlangah Public Distribution System (PDS) kaltlanga man tlawm zawka pek an nih avang leh Mautam avanga buhfai inpek nana senso nasa taka sen belh atih ngaih avang bawkin sum lama harsatna kan tawh thu a sawilang a. Hei hi central sorkar chuan abik taka hriatthiam neiin min phuhruk sak ngei turin Pu Hawla chuan Prime Minister hi angen nghal a ni. Chini chungchangah Chief Minister chuan tuna min pek ang thla tin 666 MT atanga kan khawpkham tur 800 MT ah min tihsan sak turin sorkar laipui chu a ngen bawk ani.

Ei tur dah thatna hmunpui storage facilities chungchangah Mizoram sorkarin 1.20MT a lian building satliah maia sak a neih thu Chief Minister chuan sawilangin, tha tak nei thei tur chuan central sorkar tanpuina kan mamawh thu a sawi bawk . Chief Minister Pu Lal Thanhawla chuan a thusawi tlangkawm nan Mizoramah Essential Commodities Act chu tha taka hman a nih thu Conferenceah hian a sawilang bawk a ni.