Pu R.Lalzirliana, Home Minister chuan vawiin khan AR Lammual ah Independence Day Celebration Invitation Football Tournament leh MFA Catch Them Young Programme, 2011 a hawng.

Minister chuan tunlai thalai vanneihzia sawiin khelmual leh coach tha an neih thu te a sawi a, Mizoram Football Association ten season thar, 2011-2012 chhung Catch Them Young changtlung tak an kalpui tum chu fakawm tiin a bultan tute chu entawn tlaka an awm a ngai a ni a ti.

Vawiin hawnna inkhawm ah hian Pu K.S Thanga, Parliamentary Secretary leh Official engemawzat an tel a. Khuallian hian 2011 a Iran a U-14 Asian Football Confederation a Mizo footballer paruk hnenah Mizoram State Sports Council-in Rs. 10,000 theuh leh Mizoram Olympic Association in Rs. 20,000 theuh an pek chu a hlan a ni. Heng footballer te hi : Jonathan Lalmuansanga, Bethlehem; Vanlalruata, Armed Veng; Lalthansanga, Kanhmun; Lalmuanzova, Kanhmun; Lalrintluanga, Armed Veng leh Lalremruata, Ramhlun South te an ni.

Independence Day Celebration Invitation Tournament ah hian Mizoram Football history a a vawi khatna atan India rama football intihsiakna sang ber, I Leaque a khel phak team Shillong Lajong FC chu sawm an ni a, anni bakah hian Meghalaya champion Royal Wahingdoh Football club pawh sawm an ni, an tel tur thi hi ziakin an rawn nemnghet tawh a ni.

MFA chuan he hunah hian heng Aizawla club hrang hrang - 1st MAP Football Academy, Dinthar FC, Luangmual FC, FC Kulikawn, 1st MAP FC, 3rd MAP FC, SYS FC, Aizawl Football Club te a sawm bawk. He tournament ah hian champion team in Rs. 1,00,000/- an dawng ang a, pahnihna in Rs. 50,000/- an dawng ang a, semi final a chak lo team pahnihin Rs. 10,000/- ve ve an dawng bawk ang.

India rama football division sang bera khel phak, I Leaque team Shillong Lajong FC leh Indian football a club inelna sang ber dawttu Second division I Leaque team Royal Wahingdoh te hi semi final thleng saa dah an ni a, Mizoram club pariatte hi group hnihah thenin group leaque an khel ang a, a sang ber ve ve in semi final an lut ang. Mizoram a team tel tur pariat zinga pathum hi Home Department hnuaia awm, 1st MAP Football Academy 1st MAP FC leh 3rd MAP FC te an ni.

Mizoram Football Association chuan MFA season thar, 2011-2012 chhung hian Catch Them Young Programme changtlung taka kalpui a tum a. Aizawlah bul tan phawt a ni ang a, district dangah hawn belh zel a ni ang. Aizawla khelmual 8 ah naupangte zirna tur hi buatsaih a ni a, coach te pawh thlan fel tawh an ni a, naupangte pawh selection neih fel vek tawh a ni.