Site Last Updated: 17th October 2017, 4:11 PM

AGRICULTURE MINISTER PU K.S.THANGA’N REVIEW MEETING HMANPUI

Vawiin khan Agriculture Minister Pu K.S.Thanga chuan ni 2 awh tur ‘Support to Extension Programmes for Extension Reforms (ATMA Scheme)’ hnathawh dan thlirletna (review meeting) chu Agriculture Conference Hall, Aizawl-ah a hmanpui a. He meeting hi kum 2016-2017 leh 2017-2018 Second Quarters chhunga hnathawhte thlirlet nan hman a ni ang a, District hrang hranga ATMA Staff te leh Agriculture Department-a Officers te an tel. 

Minister  Pu K.S.Thanga chuan Agriculture Department-in a kalpui mek SAMETI leh ATMA hnuaia thawktu zawng zawngten ram dangte a bik takin khawchhak ramte thil tha tih entawn in kan thiamna leh finna te kan ram tana thahnemngai taka hmang thin turin a chah a. A tul chuan a hmun ngeiah loneitute kal chilh a, an harsatnate chinfelpui thei tura staff-te chu inpuahchah leh inpeih reng turin a hrilh bawk. Mizoramin ei leh bar, buh leh bala a intodelhna tur kawng a zawh mekah ngaihtuahna thar nen bultan a ni dawn a, chuvangin theihtawp a hma la tura ke pen a pawimawh a; Minister a nihna anga theihtawp chhuahpui a inhuam thu a sawi bawk. District hrang hrang a hman tur Projector leh Hand-Held Device te chu Minister-in a sem nghal a ni.

Review Meeting hi Agriculture Secretary leh Inter Departmental Working Group (IDWG) Chairman ni bawk Pu Lalhmingthanga-in a kaihruai a. Pu J Lalzamliana, SNO, ATMA & Director (CH) chuan meeting kal zawng zawngte lawmna thu a sawi hnuah Pu R.K. Nithanga, Director SAMETI & State Coordinator (ATMA)-in ATMA scheme chungchang sawifiahna hun a hmang bawk. Meeting hawnna hun hi Agriculture Additional Secretary Pi Vanlalrawni’n lawmthu sawina hmangin a khar a ni.

Written by Mina Zoliani MIS, IPRO DATED: 12th October 2017, 4:43 PM | LANGUAGE: MIZO