Site Last Updated: 17th October 2017, 4:11 PM

AIZAWL DC HOVIN TABLE TOP MOCK DRILL EXERCISE

Vawiin chawhma khan Aizawl DC, Aizawl District Disaster Management Authority (ADDMA) Chairman ni bawk Pi  A.Muthamma hovin DC Conference Hall, Aizawlah, UNISDR - International Disaster Reduction-2017 table top mock drill exercise leh  October ni 13, 2017 a Earthquake Mock Drill neih dan tur chungchang sawihona neih a ni. 

United Nations General Assembly chuan October ni 13 hi International Day for Natural Disaster Reduction ah puangin Aizawl District ah pawh hemi ni hian hmun hrang hrangah  lirnghing lo thleng thut thei laka chhanhimna hnathawh dan tur leh mipuiten hmachhawn dan tur an thiam theih nana nunchan zir “mock drill” neih a ni dawn a. Vawiin meeting-ah hian department hrang hrang leh tlawmngai pawlte mawhphurhna leh tihtur inhrilhhriatna hun an hmang nghal a ni.

Pi A.Muthamma chuan lirnghing leh khuarel chhiatna dangte hi dan theih ni lo mah se chhiatna a tlem zawk nan inbuatsaih lawk theih a ni, a ti a. Chhiatna lo thleng thut ta se engtia hmachhawn tur nge tih inbuatsaih lawk a, kan hmanraw neih te a tha tawk em tih endik a, mipui mimirah inzirtirna tha tak kalpui a nih chuan thihna leh chhiatna thleng thei tur engemawzat kan pumpelh thei a ni, a ti. Naktuka mock drill neih tur chungchangah chi ai lo turin DC chuan mipuite a chah nghal bawk a ni. 

Vawiina Table Top Exercise-ah hian Disaster Management and Rehabilitation (DM&R) Department Assistant Director Dr Lalrokima Chenkual chuan lirnghing lo thlen thulha Aizawl khawpuia chhiatna thlen theih dan tur nia langte powerpoint hmangin a sawifiah a. ADDMA CEO leh Additional DC ni bawk Pu John LT Sanga’n Aizawl District inbuatsaih dan sawiin Aizawl SP, Aizawl Civil Hospital, National Disaster Response Force aiawhte bakah  State Disaster Management Coordinator leh District Organiser, DM&R ten thu an sawi bawk a ni.

Written by Lalnunmawii MIS, IPRO DATED: 12th October 2017, 2:38 PM | LANGUAGE: MIZO