Site Last Updated: 21st April 2018, 5:26 PM

AIZAWL DISTRICT A ZIRTIRTUTE TAN SAPTAWNG ZIRTIRNA A INTAHHRIAMNA WORSHOP HAWN A NI

Vawiin chawhma khan Aizawl DC's  Conference Hall-ah Bawrhsap Dr.A.Muthamma chuan Aizawl District huam chhunga zirlaite Saptawng a tihhmasawn an nih theih nan ni 5 chhung awh, Training of Teachers chu a hawng. Training chhung hian Aizawl District chhunga Primary School  leh High School thlanchhuahte atanga English Teacher ten Video Conference hmanga  Saptawng zirtir chungchangah English Learning Foundation, Chennai an thawhpui dan tur an zir dawn a ni. 

Meeting kaihruaitu, Aizawl District Bawrhsap Dr.A.Muthamma chuan Bawrhsap hmasa zawk hunlai khan Aizawl District chhunga zirlaite chu zirchian an ni tih a sawi a. Zirchiannaah hian zirlaite chuan Saptawng - ziak leh chhiar bakah inbiakna atana hman kawngah harsatna an nei tih hmuhchhuah a ni a ti. Saptawng a zirlaite harsatna sutkian  nan hian ELF, Chennai chu Primary School 10-ah kum khat chhung thawhpui an ni tawh a ti a. an thawhhonaah   hmasawnna a awm avangin kuminah pawh chhunzawm leh a ni dawn a ti. Kuminah phei chuan High School te pawh telh an ni ve dawn a ti a. Bawhsap chuan Saptawng chu Sawrkarin indawrna atana tawng a hman mek a nih piah lamah khawvel mipuiten inbiak nana  an hman ber a nih avangin thiam nal a pawimawh hle a ni a ti. 

ELF, Chennai hotute chuan kum liamta chhung khan Aizawl District SSA nen an thawhhona hnuaiah  Primary Sikul 10-ah  zirtirtu ruatbik neiin hlawhtling takin zirlaite tan saptawng a hmasawnna  programme buatsaih a ni tawh an ti  a. Kuminah pawh Primary 10-ah leh High School thlanbikah te SSA leh RMSA te an thawhpui leh dawn tih an tarlang a ni. 

Training of Teachers hawnna hunah hian Pi Thara Sridhar, Chief Coordinator, ELF, Chennai chuan Mizoramah an hmalak tawhnaah chuan an hlawhtling thawkhat  tih a sawiin an hmachhawp thar te bakah  zirtirna kalpui a nih leh dan tur sawifiahna hun a hmang a. He hunah hian zirtirtute leh official ten Saptawng zirtirna kawnga ELF an thawhpui dan te leh zirlaiten an sawtpui dante an sawiho a ni.

 

Written by Malsawmsanga, MIS, IPRO DATED: 16th April 2018, 12:35 PM | LANGUAGE: MIZO