Site Last Updated: 23rd September 2017, 1:56 PM

AIZAWL TRAFFIC JAM FREE SAWIHO

Vawiin khan State Traffic Management Committee in Working Group Committee a din convener Pu Biakzama, Addl. Secretary, Home Department hovin Aizawl S.P (Traffic) Office ah Aizawl Traffic Jam Free atana hmalakna sawiho a ni. 

Working Group Committee on Traffic Management chuan 1st October 2017 atanga tan tur, Registration No. tawpna No. zel te, din chhawkin a huam leh huam lohte sawiho a ni. 

Indin chhawk hian Governor, Chief Minister leh Speaker motor te a huam lovang a, Police, Security Force, Department Despatch Rider, City Bus, Taxi, Department Bus, 2 Wheeler Taxi, Fire Service, Bawnghnute sem, Institution Bus, Maxi Cub leh Magistrate leh Department a emergency duty awmte a huam lovang tih rel a ni. 

Nitin zing dar 8 : 30 atanga tlai dar 6 : 00 thleng tlan phalloh motor No. neite hi an din a ngai ang. 

National Highway Sairang - Bawngkawn - Zemabawk kal turte pawh he khapna dan hian a huam lovang tih rel a ni. 

Emergency thilah mimal emaw, Sorkar tan tlanchhuah a tul chuan Police Control Room, 0389 - 2322307/0389-2313061 (24 hrs duty) ah dilin an mamawhna a zirin tlan phalna pek an ni thei bawk dawn tih a ni. Zin laklawh Aizawl rawn luh ngai tan pawh heng phone no. tarlanah hian phalna la turin ruahmanna siam a ni bawk. 

Garage neih theuh tur chungchangah meeting chuan, motor neitu zawng zawng chuan garage neih tur tih chu 1st December, 2017 atang chuan khauh taka hmalak tur tih relin, AMC kaltlangin Local Council te nen hemi chungchang sawihona ni 20, September 2017 ah neih nise tih a ni bawk. 

Garage neih theuh tur tih leh indin chhawk ni siam hi Aizawl khawpui chenna tlaka siam tumna ani tih hre reng a, a helh zawng nilova tha taka a hlawhtlin theih nan mitin in zawm a, thawhhopui turin Working Group Committee on Traffic Management Committee chuan mitin te a ngen nawn leh a ni. Tuna kan tih theihloh chuan engtikah mah Aizawl khawpui nuam siamna hun kan nei tawh lovang tiin mipuite an ngen a ni.

Traffic Working Committee Member te hi Pu Lalbiakzama, Addl. Secretary, Home, Convener; Pu R. Lalbiakthanga,  Councillor, AMC, Member; Pu R. Lalrammawia, Joint Director, Transport, Member; Pu David L. Thangliana, Joint Director, I & PR, Member; Pu C. Lalthanmawia, SP Traffic, Member Secretary te an ni.

Written by David L. Thangliana, MIS, Joint Director DATED: 13th September 2017, 3:52 PM | LANGUAGE: MIZO