Site Last Updated: 26th May 2018, 5:46 PM

CHIEF MINISTER HOVIN MIZORAM STATE BOARD FOR WILDLIFE MEETING NEIH A NI

Mizoram State Board for Wildlife Chairman, Chief Minister Pu Lal Thanhawla kaihhruaina hnuaiah vawiin khan Chief Minister's Office Conference Hall-ah Mizoram State Board for Wildlife meeting vawi 6-na neih a ni.
Chief Minister chuan India hmarchhak state dangte ang bawkin Mizoram chu Biodiversity-ah a hausak avangin humhalh that a, tangkai taka hman thiam chuan hun lo kal zel tura ram economy hmasawnna innghahna pawimawh tak tur a nih thu a sawi a. Sawrkar laipui pawhin ramngaw leh nungcha humhalh a ngaihpawimawh thu leh, Mizoram Biodiversity hausakna hmang tangkai thei tura zirchianna hmun Ayush Research Centre Mizorama din phalna pawh a thuphunga sawrkar laipuiin a pek tawh thu a sawi. Chief Minister chuan Mizorama Protected Area kan neih te hi neih a tul chhan leh a hlutna kan hriat chian a, sawrkar humhalh chin bakah pawh thlai leh hnim, hmun danga awm manglo tangkai leh vang tak takte chu vahchereu emaw ruk chhuah an nih mai loh nan a chhunga cheng mipuiin hlut nachang kan hriat a tul a ni, tiin hemi kawnga inhrilhhriatna tha lehzual neih tul a tih thu a sawi a. Thahnemngaih avanga mimal leh pawl anga nungcha humhalh kawnga penchhuak an awm belh ta zel chu lawmawm tiin, dan  kalh a silai lek a che thinte chu khauh zawka khuahkhirh pawimawh thu a sawi bawk a. State Board for Wildlife chu chutianga ramngaw nungcha humhalh kawnga hmasawn theihna hrang hrangah State Sawrkar thurawn petu tur a nih angin member-te chu ngaihtuahna seng a thahnemngai taka hma la turin Chief Minister chuan a sawm a ni.
Vawiin meeting-a thurel zingah ransa in mihring leh a khawih nat (wildlife attack)  leh huan thlai a tihchhiat thul a zangnadawmna pek thin ex-gratia compensation chungchang te, Phawngpui National Park leh Ngengpui Wildlife Sanctuary enkawl zui zel dan tur te, Aizawl Zoological Park entry fee chungchang leh Thorangtlang Wildlife Sanctuary a dan kalh a chhungkua la cheng chungchangte sawiho a ni a. Vawiin meeting chuan Aizawl Zoological Park thawhtute tan luh man (entry fee) chu thil man pung zel ngaihtuahin cheng 10 atanga cheng 20 a tipung turin rawtna/ recommendation siam tha a ti a. Phawngpui National Park leh Ngengpui Wildlife Sanctuary chu state sawrkar hnuaia Environment, Forest & Climate Change Department kaltlanga enkawl mek chu uluk lehzuala enkawl a, humhalh kawngah pawh khauh zawka kalpui ni se tia rel niin, LADC hotute nena nasa zawka thawhhona neih an duh thu sawi a ni. Ex-gratia compensation hi ramsa laka nunna tuar te hnenah cheng nuai hnih pek thin niin, hliam tuar te tan an inenkawlna tum sak thin a ni bawk. 
Dampui 'S' a chengte chu Torangtlang Wildlife Sanctuary a puan a nih tak avanga insuanchhuak tura Dan in a beisei angin relocation kalpui a ni a, tun dinhmunah chhungkua 11 Dampui 'S' ah an la awm a. Chung mite tan chuan chak zawka relocation kalpui a nih theih vawiin State Board for Wildlife thukhawm chuan hma lak ni se tin a rel a ni.
Vawiin meeting-hian Tuivawl bialtu MLA
 Pu R.L. Pianmawia, Deputy Chief Whip; Principal Secretary to CM Pu Lalram Thanga, PCCF leh member dang thahnem tak an kal a ni. A vaiin State Board for Wildlife-ah hian member 30 an awm. 
Written by Emily Lalrinpuii, MIS, PIO to Chief Minister DATED: 16th May 2018, 4:52 PM | LANGUAGE: MIZO