Site Last Updated: 23rd September 2017, 1:56 PM

CHIEF MINISTER HOVIN VAWIKHAT NAN MIZORAM ROAD FUND BOARD THUKHAWM - KAWNGPUI ENKAWLNA SUMHNAR THAR RUAHMAN

Vawiin khan Chief Minister's Conference Hall-ah Mizoram Road Fund Act 2007( Ammended in 2016) leh Mizoram Road Fund Rules, 2017 tlawhchhan a din, Mizoram Road Fund Board(MRFB) chu a vawikhatna atan, Chief Minister Pu Lal Thanhawla hovin, a taka hnathawh tan dan tur leh hmalak dan tur rel in an thu khawm. 

Meeting kaihruaitu, Chief Minister Pu Lal Thanhawla, MRFB Chairman ni bawk chuan Mizoram chhunga kawng tam tak, a siam tu ten kum 5 chhung an lo enkawl tawh te,  state sawrkarin a enkawl chhunzawm chhoh ngai tam tak a awm belh vang te, PWD enkawl kawng pui te chak zawka siam that vat a nih theihna tur te a thuneihna neia hnathawk turin MRFB chu din a ni tih a sawi a. 

Kum dang ang lo takin March thla tir phat atanga ruah a tlak chhunzawm avangin alkatra luan kawng siam leh kawng thawm that hrim hrim pawh a harsa tih a sawi a. Kawngsiam bakah kuthnathawktute tan thlenga  lohal thu hla ah pawh harsat na a awm  thu leh ruahtui tam luat  avanga harsatna tam tak a thleng chu pawi a tih tak zet thu a sawi. Sawrkarin kawngsiam chu a ngaihthah loh thu sawiin Mizoram sawrkar chuan state thanglai, Mizoram ang te tana kawng pawimawh zia a hre chiang em em a; hun remchang hmasaber nghakin kawngsiam hna thawk turin, PWD pawh an inpeih reng tawh a, khua in a zir veleh hna thawh tan a ni ang a ti. 

Mizoram chu  leilung  thawl leh lung chang tha kawngsiamna tur awm lohna hmun a ni tih hriat a tul thu a sawi a. Kawngpui tam zawk te chu lirthei ke pali nei tlan theihna awrh a rinawm tura a lo siam a ni thin a. Tunah lirthei lian zawk ke 10 chung nei ten an zawh reng takah chuan kawng in a dawl ta lo tih sawiin Chief Minister chuan PWD mithiam te pawn kawng tlo zawka siam a nih theih nan ngaihtuahna sengin theih pa tawp an chhuah mek zel a ti a. Tui luankawr thianfai  ngun tur leh officer lian te pawh hnathawhna hmunah chetla tam zawk turin  innawr leh infuih reng a ni a ti. 

 Chief Minister chuan kawng chu sawrkarin mipui tan a siam a, a neitu leh a hmangtu chu mipui an ni a, a chhiat pawhin a neitu chuan mawhphurhna rilru nen a theihna zawnah a enkawl leh a venhim a tul a. Mi tlawmngai tam tak, kawngpui thawm that hnatlang, neitu rilru pua lo  thawk  thin zawng zawng te chungah thinlung takin lawmthu a sawi a ti a. Kawngdung a lirthei sil, sahbawn phuan leihbuak, insuk leh kawngpui chhuat a thlirtlawn chhun ngil chawrh chawrh ang te pawh bansan a hun a, a khapna te pawh khauh zawkin road task force leh Bawrhsap Office a thawk ten an kalpui a ngai dawn tih a sawi a ni. 

Meeting a thusawitu dang, Finance Minister Pu Lalsawta chuan Mizoram vanneihna chu vantlang inlungrual leh  tlawmngai pawl te an nih thu sawiin anni an tel theihna tura kawngsiam leh hmalakna tam zawka ruahmanna siam chu a tangkai hlea  a rin thu a sawi a. 'Tih thin dan a ni lo' tih tlawh chhan a, chhuanlam siam fo chu thanmawh bawk a nih thu sawiin mipui vantlang, tlawmngai pawl te pawh kawngsiam, leh venhim an tel thuk zawk nan ruahmanna duan ni se . A  neitu chan chang an rawn pun zel chuan tun aiin kawng enkawl chu thil awl zawk a ni ang a ti. 

PWD Principal Secretary Pu Lal Ramthanga chuan PWD in kawng siamna, Central atanga PWD in kawngsiamna sum a dawn dan te, enkawlna atana sum a neih te, hnathawh a nih dan, harsatna, hnathawhna tur sum duhkhawplohna bakah MRFB hmachhawp leh MRFB in sum a hmuh dan tur te computer hmangin powerpoint presentation nen a hrilhfiah a. 

 Planning leh Finance Department  in a ruahman sak zat, kawng leh lei enkawlna sum chu PWD in Budget head  3054 ah an dawng a, kawng siamthat ngai leh lei siamthat ngai chungchang chu ruahmanna felfai taka siam in PWD Division ten an rawn thehlut a. Ruahmanna leh sum rawn lut te chu uluk taka Chief Engineer(planning) office in a ngaihtuah hnuah Work Orser siam in PWD  Division te chu hnathawh tur pek an ni leh a ni. 

PWD Secretary tarlan dan chuan tun dinhmunah Mizoram chhunga National Highway Km 1465 chu Chief Engineer-Highways kaihruaina hnuaia MPWD chuan Ministry of Road Transport and Highways(MORTH) atanga sum a hmuh in enkawl mek a.  Aizawl khawpui chhung kawngpui te, World bank leh Asian Development Bank project hnuai kawngpui leh Kolasib Division tih loh zawng chu Chief Engineer - Roads kaihhruaina hnuaia enkawl a ni. 

Chief Engineer - Roads enkawlna hnuaiah hian State Budget hmangin  kawngpui Km 4662 a thui leh Lei 105 enkawl mek a ni a. Kawng enkawlna ah hian hnim samfai, kawng chhelai khuh that, kawngkhuar hnawhkhah, tuihawk luankawr thenfai, culvert siamthat leh lungrem thawmthat leh kawng a thing leh mau tlu thenfai te thlengin a tel a.  Heng senso atan hian kum 2015-16 khan Cheng vaibelchhe 33.50/- dah niin 2016-17 atan Cheng vaibelchhe 36.70/- dah a ni a, 2017-18 atan cheng vaibelchhe 39.50/- dah a ni. Hetih lai hian Mizoram chhunga registered vehicle, 2015-16  lirthei chhiarpui behchhana awm zat chu, lirthei chi hrang hrang nuai khat leh singruk leh sangnga zet a ni. 

PWD E-in-C Pu R. Vanlaltluanga'n PWD chhut dan leh senso mamawh zat  sawifiah a. Tuna kawng enkawlna atana state budget a sum dah chu normal maintenance - kawngkhuar khuh thatna, leimin thenfai, kawng ko samfai leh a te sep pawh daihlo a ni a ti a. Alkatra luan kawngpui te  a lo chhiat a siamthat, kawngbal siam that, culvert siam that, lei thawm that leh kawng enkawlna hna hautak zawkte thawk thei tur chuan kum khat ah cheng vaibelchhe 257.96 tal sen a ngai tih a sawi a. Kumkhat chhunga alkatra luan kawngpui  Km 1 thawm tha/enkawlna turin Cheng Sing Sarih  leh alkatra luanloh kawng Km 1 athui siamtha/enkawlna  turin Cheng singli a ngai anga chhut a ni a ti a. Kum in June thla thlenga leimin/ lei tawlh report PWD in a dawt zat chu 984 a ni a, Kawngpui chat thla, tlabal 81, Retaining Wall chim 40 deuh thaw leh Culvert chhia ringawt pawh 94 zet a ni hman tih a tarlang a ni. 

Mizoram Road Fund Board a hian Chief Minister chu Chairman a ni a, Vice Chairman ah Chief secretary, Member Secretary ah PWD Secretary, Member dang te - Secretaries - Finance, Planning, Law & judicial, Transport, LR&S, Taxation, PWD atangin E in C, CE's(Roads, Highways, Buildings), AMC Commissioner, IGP, Transport Director, Stakeholders aiah mi 3 leh  NGO aiawh mi 4 te an ni a. MRFB meeting-ah hian hnathawhna tur sum rawn luanluhna tur ruahman chu sawiho a ni a. MRFB in Fund Source & Collecting agent zingah a rinluh,  kawngpui chhawr rim deuh enkawltu Department leh body a thlanchhuah te chu - Transport department, Taxation department, PWD, Home department, Environment Forest & Climate Change, Geology & mineral Resources leh AMC te an ni. Heng Department leh body ten cess, tax, fees, royalties leh fines atanga an sum rawnchhunluh zinga a then a zar chu MRFB hian kawngpui enkawlnan a hmang tura ruahman a ni. Meetingah hian member ten ngaihdan thawhkhawm in alkatra luan kawngpui ringawt lo deuh kawngpui tlo zawk a awm theih nan thiamna thar tangkai zawkte dap zel chungchang pawh sawiho a ni.

Written by Malsawmsanga, MIS, PIO to Chief Minister DATED: 13th September 2017, 4:13 PM | LANGUAGE: MIZO