Site Last Updated: 22nd February 2018, 1:42 PM

CHITE LUI FINTU PAHNIH THENFAI HNATLANG NSS VOLUNTEER TEN AN NEI

Aizawl DC Office leh Save Chite Lui Coordination Committee tangkawpa buatsaihin vawiin khan Aizawl College leh Aizawl North College NSS Unit-te chuan Chite Lui chawmtu pahnih – Chanmari Lui leh Mirawng Lui thenfai hnatlang an nei.

Chite Lui bul Chite In (Community Hall)-ah hnatlanga chhuak turte hi Aizawl DC Dr. A. Muthamma chuan thlah liamin, lui thenfai hnathawh inhuama thalai tam tak an thawkchhuak chu lawmawm a tih thu a sawi a. Chite Lui chu ram dang khawpuia lui awmte ang bawkin tihbawlhhlawh a hlawh thu leh, chutihruala Mizoram vanneihna chu a chhunga cheng ten faina leh thianghlimna kawnga hmasawn an duhna hi a ni tiin, kum hmasa lama ngaihventu thenkhatte hmalakna avanga Chite lui thenfai hnatlang neih a nih hnu khan hmasawnna a awm thu a sawi a. Thalai kalkhawmte chuan Chite Lui mawi tak thin khan ngaihawhtir leh turin Aizawl mipuite tanrual a pawimawhzia leh, thalaite inpekna kaltlangin mi tamzawkin an hriatchhuah ngei a beisei thu DC hian a sawi bawk.

He inkhawm tawi hi Pu John L.T. Sanga, Addl. DC chuan kaihruaiin, Dr. Zirlianngura, State NSS Officer cum Deputy Secretary, NSS Cell, SYS Department leh Pu Rochamliana, Secretary, Save Chite Lui Coordination Committee-te chuan thu an sawi bawk a.

Vawiin hnatlangah hian Aizawl College NSS Volunteer-te hian Mirawng Lui thianfaiin, North College NSS Unit chu Chanmari Lui lamah an kal a. College pahnih atang hian mi 150 ve ve thawkchhuak anga ngaih a ni. Nikum khan September thla ah Chite lui dung thenfai hna Aizawl khawchhunga College hrang hranga NSS Volunteer ten lo nei tawhin, November thla khan Higher Secondary School hrang hranga NSS Volunteer-te an lo hnatlang tawh bawk a ni.

Written by Emily Lalrinpuii, MIS, IPRO DATED: 13th February 2018, 2:52 PM | LANGUAGE: MIZO