Site Last Updated: 26th May 2018, 5:46 PM

HEALTH & FAMILY WELFARE MINISTER IN MIZORAM GOVT. NURSING SERVICE ASSOCIATION 20TH BIENNIAL GENERAL CONFERENCE HMANPUI

Vawiin khan Mizoram Govt. Nursing Association 20th Biennial General Conference chu Civil Hospital Aizawl  Conference Hall ah hman niin, "Challenges for Today's Nurses" tih thupuiah hman a ni.  Health & Family Welfare Minister Pu Lal Thanzara chu Khuallian niin MGNA hruaitute leh member thahnem tak te bakah Civil hospital Aizawl a hotute nen he hun hi hman a ni.

Health & Family Welfare Minister Pu Lal Thanzara chuan Nurse hna chu mahni aia damlo leh enkawl ngaite dah hmasak ngaihna, chau leh beidawngte hnena thlamuanna, beiseina leh malsawmna thlen theitu in ni tih hre chungin he hna zahawm tak hi in thawk thin dawn nia, a ti a, Nurse indaihlohna nasa tak kara phunnawi lova damlote in enkawl thin hi a lawmawm takzet a ni, a ti bawk. Pu Lal Thanzara chuan ram pawn hmun hrang hranga thawk Mizo Nurse te an hmingtha hle ni a lang chu lawmawm a tih thu a sawi a, Sawrkar hnuaia thawk Nurse te chu Sawrkar hmel lanna leh darthlalang pawimawh tak an nih avangin damlo dawnsawnna kawngah biak nuam leh hawihhawm taka damlote lo chhawn zel turin a chah bawk. Health minister chuan H&FW hmalakna hrang hrangte sawiin Nurse hna lakbelh tura ruahmanna kal mek te a tarlang a, 2013-18 chhung hian Health care hnuaiah Vaibelchhia 66.55 leh RSBY hnuaiah Vaibelchhia 53.88 hman anih tawh thu a tarlang bawk. 

Pi Kapzawni, Senior Lecturer MCON hnen atangin Conference Thupui sawi hona hun Power Point Presentation hmangin neih a ni a, Kum 2017-18 chhunga Nurse pension te thilpek hlanna hun te neih niin Member boraltate sunna hun hman a ni bawk. Conference hi ni hnih awh tur niin MGNSA hruaitu thar thlanna hun hman tur a ni bawk a ni.

Minister Pu Lal Thanzara chuan MGNSA Conference hawnna a hmanpui zawh hian Aizawl Civil Hospital hotute nen Civil Hospital a hmalakna kal mekte an thlir hova, Dental Ward, Reverse Osmosis Plant, Chapel leh Geriatric Building te an fang nghal bawk a ni.

Written by Hmingthanzuala, MIS, IPRO DATED: 16th May 2018, 3:51 PM | LANGUAGE: MIZO