Site Last Updated: 26th May 2018, 5:46 PM

HOME MINISTER-IN CHURACHANDPUR-AH HMAR MARTAR-TE NI A HMANPUI

Home Minister Pu R.Lalzirliana chuan vawiin khan Saikawt Field, Churachandpur, Manipur ah Hmar Martyr’s Day vawi-28na a hmanpui.
 
Home Minister Pu R.Lalzirliana chuan Mizoram Sawrkar leh HPC(D)-in remna thuthlung an ziah tak avangin Sinlung Hills Council Bill pass turin hma chak taka lak mek a ni a, June 2018 chhung hian Special Assembly kovin Assembly a pass hman turin ruahmanna siam a ni, a ti. Pu R.Lalzirliana chuan Sinlung Hills Development Council (SHDC) Chairman leh member-te term (interim period) chu May 31, 2018 ah a tawp dawn avangin Political Level Talks a rel tawh leh Draft SHC Bill ah pawh sawi lan a nih angin, Sinlung Hills Council atan a General Council Election Mizoram sawrkarin a buatsaih hmaa interim General Council Member ruat dan tur sawrkar ruahmanna a tarlang a. Interim General Council Member tur 14 hi Mizoram Sawrkarin remna a lo siampui tawh HPC (D) hruaitute hnen atangin mi tha, an duhzawng mi 15 velhming leh address kim chang sawrkarin a dawng tawh a, chu chu lo belchiangin June 2018 chhung in member 14 te hi ruatfel an ni ang, a ti. Heng Interim General Council Member atana ruat te hian General Council inthlan hma zawng  Mizoram sawrkar nen inrawn chungin SHC Act in a phut leh beisei angin hna an thawk ang a, SHC mumal tak din chhoh zel a nih theih nan hma an la ang, Home Minister chuan a ti bawk.
 
Pu R Lalzirliana chuan Mizoram Sawrkarin ruahmanna fel tak Mizoram Insurgents Surrender and Rehabilitation Policy,2017 a lo duan tawh angin HPC (D) cadre Mizorama lo kir lehten eizawnna tlak thiamna an neih theih nan a duh apiang tan Skill Development Training theihna tur kawng a hawn sak dawn, a ti a. HPC (D) cadre-te hnena rehabilitation package sem bang chu May 25 ah Disaster Management & Rehabilation Director in cadre te hnenah sem a nih tur thu he hunah hian a sawi a ni. Hmar Martarte hriatrengna ni hmangtute hnenah Zofate chu tlang leh mual hrang hrangah then darhin awm mahila kan thinlung erawh tu mahin min thendarh sak theilo, a ti a. Mizorama lehkhathiam hmasa leh mi hausa hmasa, Mizo mi langsar tam tak hi Hmar chhulchhuak an ni a, chuvangin Hmar unaute chu Mizoram chhungah hnam tenau anga autonomy neih an tumna bansan a, Mizoram hi an ta a nih hria a huikhawmtu ni zawk turin Home Minister Pu R.Lalzirliana chuan a chah a. Zofate hi tang khawma intelkhawm tur kan ni tih hi tuma hrilh ngai lovin kan chiang tur a ni, a ti.
28th Hmar Martyr's Day hi Hmar Martyr's Trophy Organising Board (TOB) buatsaih niin Manipur Renewable Energy Development Agency (MANIREDA) Chairman leh Manipur Legislative Assembly Member Pu Ginsuanhau Zou chu khual zahawm a ni a. Dr. Chaltonlien Amo, MLA, Manipur chu Martyr's Day thlengtu (Chief Host) a ni. Martarte ni pual hian 15th Manipur State Level Hmar Martyr's Trophy football buatsaih a ni. 
Martarte hriatrengna lungphunah Home Minister Pu R Lalzirliana, Manipur MLA pathum - Pu Ginsuanhau Zou, Pu Vungzagin Valte leh Dr Chaltonlien Amo te bakah HPC (D) hruaitu leh mi pawimawh dangten  hriatrengna pangpar an hlan a. Kuki Khanglai Lompi, Young Paite Association, Young Mizo Association leh Hmar Youth Association ten hnam lam an entir a ni.
Home Minister Pu R. Lalzirliana hi Mizoram Sawrkar Home Department-a Principal Secretary Pu Lalnunmawia Chuaungo, IAS; Pu David Thangliana, MPS, OSD, Home leh Pi Lalnunmawii, MIS, IPRO ten an tawiawm a ni.
Written by Lalnunmawii, MIS, IPRO DATED: 16th May 2018, 5:16 PM | LANGUAGE: MIZO