Site Last Updated: 21st September 2017, 5:49 PM

HSLC LEH HSSLC TOPPERS-TE HNENAH CHIEF MINISTER'S AWARD HLAN

Vawiin khan Aizawl Vanapa Hall-ah kum 2017 HSLC leh HSSLC result tihchhuah taka topper-te hnenah Chief Minister's award hlan a ni a. Education Minister Pu H Rohluna chu khuallian niin Parliamentary Secretary Pu Joseph Lalhimpuia chu khual zahawm a ni. 

Pu H.Rohluna chuan zirna hi hnam hmasawnna atana lungphum pawimawh ber a ni tih hriain sawrkar chuan a ngai pawimawh a, kan thlen chin atangin nasa takin hma kan sawn a, hmasawn zel tur erawh kan ni, a ti. Hlawhtling taka exam buatsaih a, result felfai taka tichhuaktu MBSE a thawktute thawhrimna fakawm a ti a. Kumina hman tan HSLC a internal marks pek chungchangah pawh a vawikhatna ni mah se MBSE hotute nena an thlir ho hnuah tha thawkhat viaua an hriat thu leh kumin atangin pawl 11 leh 12 ah pawh hman tan tum a nih thu Education Minister chuan a sawi a. Internal marks pek dan chungchangah inkaihhruaina tha tak siam a ni a, siamthat ngai lai a awm a nih chuan siam that zel a ni ang, a ti. Pu H.Rohluna chuan Aizawl leh Lunglei DIET-a B.Ed zirna hawn tum a nih thu leh National Council For Teacher Education (NCTE) pawmpuina pawh hmuh a ni tawh thu he hunah hian a sawi a. Toppers-te lawmpuiin Zoram mipui mitfukna an ni tawh tih hria a, hnungtawlh lo a hmalam pan zel turin a fuih bawk a ni. 

Parliamentary Secretary Pu Joseph Lalhimpuia pawhin zirlai hlawhtling tharte chu intlansiakna bul an tan chauh tih hria a, a tawp tlan thleng ngei turin a fuih a. Zirlaibu piahlamah internet atanga engkim an hmuh theih tawhna khawvelah remchanna lei zel a, thil thalo erawh hnawl turin a fuih. Kum reilote chhunga zirna tihchangtlunna tura sawrkar hmalakna a sawilan bakah sawrkar school zirtirtute mawhphurhna sanzia leh Mizoram zirna hmel tidanglam theitu an nihzia hriaa theihtawp chhuah turin Parliamentary Secretary chuan a chah bawk a ni. 

HSLC ah hian Laldintluanga, s/o Lalengthanga, Serchhip Chhim Veng, Marian High School zirlai chu pakhatna a ni a. HSSLC Science stream-ah Zomuansangi, d/o Zothansanga, Mission Vengthlang, St Pauls Hr. Sec. School zirlai chu pakhatna niin Arts-ah Lalrinzuali, d/o Lalzahawma Chinzah, Lawngtlai Bazar Veng, Home Mission School zirlai pakhatna a ni a, Commerce-ah Joseph Vanlalrema, s/o Jacob Pahlira, Lunglawn, Lunglei, Oikos Hr. Sec. School leh Vocational-ah R Zosangpuii d/o Zorinmawia, Bungkawn Tlang Veng, Govt. Mamawii Hr. Sec. School, Aizawl chu pakhatna a ni thung. 

HSLC leh HSSLC topper te hnena Chief Minister award hlan hi kum 2013 atang khan tan a ni tawh a. Kum 2016-ah scheme mumal zawka siamin Mizoram Chief Minister's Award to toppers of HSLC & HSSLC Examination under MBSE Scheme tia vuahin November 8, 2016 ah notification tihchhuah a ni. Award hian citation leh ?50,000 zel a keng tel a ni. 

Award hlanna inkhawm hi School Education Secretary Pu P.Lalchhuanga'n a kaihruai a. School Education Director Pu K Lalthawmmawia chuan award sem chhan leh bul tan a nih dan tlangpui sawiin Home Missions School Principal leh Oikos Hr. Sec. School Principal ten thu an sawi a. School Education Addl.Director Pu K Laldingliana'n lawmthu sawiin hun hnung a khar a ni.

Written by Lalnunmawii, MIS, IPRO DATED: 19th May 2017, 3:41 PM | LANGUAGE: MIZO