Site Last Updated: 23rd September 2017, 1:56 PM

KAWNGPUI KEN THIAM VAWN FAI VANTLANG THIL ENKAWL THAT INTIHHMUH A NGAI: CHIEF MINISTER

Tukin zingkar khan Chief Minister Pu Lal Thanhawla chuan Local Council anga indang thar Khatla East Local Council huam chhung tlawhin vengchhung kawngdung zauh theihdan tur te Khatla East khawtlang hruaitu ten an lo en pui a. PWD Minister Pu Lal Thanzara'n Chief Minister hi a tawiawm a ni. 

Khatla East khawtlang hruaitute  a kawmnaah Chief Minister Pu Lal Thanhawla chuan Kumpinu sawrkarin a awp lai atang daih tawh a khawpui thangzel tur ruahmanna tha a awm loh avangin Aizawl khawpui chu felfai tawk lo tih a sawi a. Mipui mamawhna avang leh a pawimawh em avangin kawngpui tihlen ngai te chu sawrkarin a tah tawlin a chei tha mek zel a ti. 

Sawrkar tana hmalak ti phurawmlo tu erawh mi duham leh midangte hmakhua miah ngailo a an lirthei neih te kawngpui a dah thin an ni a ti. Tlangram khawpui dang a mi te aiin Aizawl khawchhunga kawngpui te chu a te bik lo a. " Lirthei lei dawna garage neia inchhal, lirthei neih hnu a luhlul chhuah a kawngpui a an lirthei dah leh mai thin te hi an hnawksak tak zet a. Kawng kan siam len poh leh hengho tan hian lirthei dahna kan siam hnem a ni mai awm e a tih theih a. Khawtlang mipui ten midang tana kawhmawh bawla kawngpui ti chep tute hi kan ngaih theihloh a hun tawh a. Thenawmte leh vantlang ram nek ran a insak chin sim te, kawngpui dung te vawn fai, zah leh humhalh te hi veng tin leh a chhunga cheng khua leh tui ten kan in tihhmuh a hun tawh a ni", a ti. 

Chin Hills State a tlawh tum a Mizo khua te entawn tlak a tih thu sawiin "khawtlang tana thahnem ngaihna kawngah te, Mizo tlawmngaihna rilru a vantlang thil enkawl kawngah te, Duhlian tawng a nihna anga humhim leh chhawm nun kawngah leh kawng dang tamtak ah Mizoram chhunga khua leh veng mipui ten tluk lohna kan nei a ni" a ti a. Veng angin veng fai, ram nghahfak thalaite nun kaihhruai that, ruihlo, zuk leh hmuam a fihlim chu inelna dik  a ni a ti. 

PWD E-in-C Pu Vanlaltluanga, Pu Henry Lalmuankima, CE, PWD, UD&PA Director Pu Joseph Lalramsanga leh official ten Chief Minister hi an tawiawm a. Khatla East Veng Welfare hruaitute Pu Lalbiakzuaka leh Pu Lallianmawia ten khawtlang hruaitute leh Chief Minister inkawmna hun hi an kaihruai a ni.

 

Written by Malsawmsanga, MIS, PIO to Chief Minister DATED: 12th August 2017, 12:47 PM | LANGUAGE: MIZO