Site Last Updated: 27th April 2017, 4:02 PM

KHAWZAWL GWSS TLAWH

Khawzawl khua in Tuichang Lui Tui an Pump chhohna tur, Khawzawl Greater Water Supply Scheme chu Khawzawl Joint Village Council leh Khawzawl Group YMA hruaitu ten tun thla ni 18, Inrinni khan a hmunah kalin an tlawh a, hmalakna leh hnathawh hrang hrang te an endik a ni. 

Khawzawl Joint VC leh Group YMA hruaitute hi Khawzawl PHE Watsan Division E.E. Pu H. Lalnunthanga'n a kaihruai a, Arro khua atanga Khawzawl lama tui Pipe zawm hna thawh mek, Km. 2 vel a thui an en a, Tuichang a tui Pump na tur khawl bunna atanga tui dah khawlna tur Sipai Camp hlui tlang, Khawzawl inkarah hian tui Pipe kum 13 vel zet a thui a kal dawn a ni. Pipe Line en hnu hian Tuichang Tui Pump khawl bunna hmun an tlawh leh a, hetah hian Department hotute leh hnathawktu Contractor, Gangwal Engineering & Construction Ltd. te chuan khawlin hna a thawh dan turte chipchiar takin an hrilhfiah leh a ni. 

Khawzawl Greater Water Supply Scheme siam nan hian Urban Ministry hnuaia Lump Sum Grand atangin cheng nuai 2497.00 hmuh a ni a, tun dinhmunah cheng nuai 1,794.47 sen ral tawh niin hna pumpui thawk zo tur hian tuna sum awm hian cheng nuai 800 velin a daih dawn lo nia chhut a ni a, sum indaih lohna phuhru tur hian Fund dang hmuh beisei anih thu PHE Department hotute chuan an sawi a ni. 

Tuichang lui khuahna hmun hi nikum khan lui kuang insawn dawrh khawpin tuilianin a ti chhia a. Lung vawm khawm (Cabian Structure) hmanga khuah that leh a ni chungin a hmuna tlawhtute chuan a tlo tawk dawn lovah an ngai tih sawiin an ngaimawh thu an sawi a. Hei bakah hian tui Pump-na hmuna Power Supply lak luhna tur Electric hrui thlun hna Electric Department in an thawh mekah 33 KV Line vek tur a nih laiin Phunchawngzawl eng pekna thin 11 KV Line ban leh hrui hlui hmun engemawzat a hman a ni chu ngaimawhawm an tih thu an sawi bawk a ni.

Written by K. Laldingliani, MIS, IPRO DATED: 20th March 2017, 4:47 PM | LANGUAGE: MIZO