Site Last Updated: 23rd June 2018, 3:42 PM

LAWNGTLAIAH HLAWHTLING TAKIN NLUP KUTPUI BUATSAIH A NI

Lawngtlai District-a NLUP hlawhtlinna pho chhuahna tura Dokulha Hall-a ni hnih awh NLUP Kutpui buatsaih chu vawiin khan Lawngtlai East bialtu MLA Pu H. Zothangliana hovin khar a ni.

Pu H.Zothangliana chuan line department-te thawh rimna azarah NLUP chu a hlawhtling hle a, sawrkarin NLUP a kalpui chinah hma sawnna pawh a thang chakin, mimal tin kum khat sum lak luh (per capita income) pawh a san phah nasa hle a ni, a ti a. Lawngtlaia NLUP Kutpui buatsaih mipuiin an hlut dan chu NLUP hlawhtlinna tilang fiah zualtu nia a hriat thu a sawi. Mahnia dinchhuah tum lova mi dang á¹­anpui ngai reng mai tanpui ai chuan tanpui tlak ngei tanpui chu a tanpuitu tan pawh a nuamin a manhla zawk a; sawrkar pawhin puih tlakte chu a pui zel dawn a ni, a ti a. Sawrkar puihna dawngte chuan lawm nachang an hriat a, thawh rimna nen sawrkar hma lakna chu an chhan let zel a pawimawh a ni, a ti. 

NLUP Kutpui 2018 kharna hun hi NLUP Nodal Officer, SDO (Sadar) Pi Rochuangkimi Khenglawt MCS chuan a kaihruai a. District Agriculture Officer Pu J. Rokima chuan NLUP Kutpui 2018 kalpui a nih dan leh a hlawhtlin dan te a sawi a. Judge lam atangin Govt Lawngtlai College Principal Pu T. Thangthuama chuan NLUP Kutpui buatsaih chhunga stall tha ber puangin lawmman sem nghal a ni a. District Sericulture Officer Pu R. Lalbiakthanga'n lawm thu sawiin, hun khar a ni.

Lawngtlai District NLUP Kutpuiah hian line department pariat te'n stall hawng thei vekin, a vaiin stall 16 buatsaih a ni a. Item 418 pho chhuah niin, thil pho chhuah reng reng hi a man pangngai aia 20% zela tlawma zawrh chhuah a ni a. Chawhnu dar 1:30 thleng khan Rs nuai 7 chuang man thil hralh tawh a ni a. Dawrtu mipui lam an la tam tham deuh avangin, Kut kharna hun hman zawh hnu paw'n stall thenkhat chu thim dawn thleng hawn chhunzawm a ni. 

Lawngtlai NLUP Kutpuiah hian best stall-ah Commerce & Industries Department chu thlan an ni a. Pahnihnaah Agriculture Department leh pathumnaah AH & Vety Department te thlan niin, he'ng thlan chhuahte bakah hian line department tin chu lawmman pek vek an ni bawk.

Lawngtlaia NLUP Kutpui buatsaih hi mipuiin an hlut hle a. Khawchhe karah Kut chhimtu mipui lut leh chhuak an awm reng a, mi 3000 chuangin Kut hi an chhim a ni. Kut chhimtute hming ziahna bu siam niin, Kut chhimtu eng emaw zatin hming ziak mah se, hming ziak lo chu a tam zawk an ni a. Ni khatna leh ni hnihnaa Kut chhimtu hming ziakte atang hian a vannei ber pawtin, lawmman siamsak an ni bawk.

 

Written by C.Lalhruaitluanga, MIS, DIPRO Lawngtlai DATED: 13th June 2018, 5:02 PM | LANGUAGE: MIZO