Site Last Updated: 26th May 2018, 5:46 PM

LAWNGTLAIAH NLUP KUTPUI BUATSAIH DAN TUR REL A NI

Vawiin khan Lawngtlai DC Conference Hall-ah Addl DC Pi Ethel Rothangpuii MCS hovin Lawngtlai District-a NLUP hlawhtlinna hrang hrang pho chhuahna tur NLUP Kutpui (Fair-cum-Exhibition) buatsaih dan tur rel a ni.
He hunah hian NLUP line department tin atangin officer-te an kal khawm a. Thut khawm kaihruaitu Pi Ethel Rothangpuii chuan NLUP Kutpui buatsaih tur chungchanga NLUP Implementing Board (NIB) duh dan leh ruahmanna awm sa te a tarlang a. Line department-te chu Kutpui hlawhtling tak hman a nih theih nana theih tawp chhuah turin a ngen nghal.
Lawngtlaiah hian NLUP Kutpui hi June ni 13 & 14, 2018 (ni hnih) chhung buatsaih ni se, tih a ni a. He thut khawmah hian a hawnna leh kharna hun hman dan tur bakah, Kutpui neih chhunga inpho dan tur te sawi ho a ni a. A hmunhma leh thil tul dang buaipuia lo en fel turin mawhphurhna hrang hrang inbel a ni bawk.
NLUP Kutpui hi NLUP hlawhtlinna pho chhuah nan district tina buatsaih turin NIB chuan a ruahman a. He hunah hian NLUP hamthatna dawngtute'n line department kal tlangin an thil thar chhuahte a man tlawma lei theihin an pho chhuak dawn a ni.
Written by C.Lalhruaitluanga, MIS, DIPRO Lawngtlai DATED: 16th May 2018, 4:19 PM | LANGUAGE: MIZO