Site Last Updated: 26th May 2018, 5:46 PM

LAWNGTLAIAH NLUP VAWK CHAW SEM

Vawiin khan AH & Vety Dept Lawngtlai chuan NLUP 3rd leh 4th Phase hnuaia vawk vulh thlangtu chhungkaw 119 hnenah vawk chaw an sem.

Lawngtlai District AH & Veterinary Officer Dr B. Zonghinga chuan sawrkarin ran vulh lama tui mite a ngaihsak thu sawiin, tuna vawk chaw an sem hi a nihna ang taka hman tur a nih thu leh hralh mai mai emaw a rem loh thu a sawi a. NLUP hmanga sawrkarin mi rethei zawkte khai chhuah a tumna tihlawhtlingtu nih tum theuh turin vawk vulhtute chu a chah nghal bawk.

NLUP 3rd leh 4th Phase-ah hian Lawngtlai District chhungah vawk vulh thlangtu chhungkaw 623 an awm a. Vawiina vawk chaw an sem hi Lawngtlai khawpui chhung bik tan a ni a. Chhungkaw pakhatin bag 12 (quintal 6) theuh an dawng a. Vawiina la dawng ve lo chhungkaw 504 te hnenah pawh hun remchang hmasa bera la sem leh tur a ni. NLUP 3rd leh 4th Phase hnuaia vawk vulh thlangtute'n tun tuma vawk chaw an dawn hi NLUP hnuaia tanpuina an dawn tawpna tur a ni.

Written by C.Lalhruaitluanga, MIS, DIPRO Lawngtlai DATED: 12th January 2018, 4:58 PM | LANGUAGE: MIZO