Site Last Updated: 23rd September 2017, 1:56 PM

LUNGLEI AH CONSULTATIVE COMMITTEE ON BIOMEDICAL WASTE MANAGEMENT RULES, 2016 NEIH A NI

Vawiin chhun khan Lunglei Convention Center Conference Hall-ah UD&PA Department buatsaihin Biomedical Waste Management Rules, 2016 (Damdawiin bawlhlawh sawngbawl Dan) chungchang sawihona hun hman a ni.

Pu Andrew Lalhruaia, District Urban Development Officer (DUDO), Lunglei District chuan he hun hi kaihruaiin tunlai khawvel changkang chho zelah uluk taka bawlhhlawh sawngbawl hi kan ngaih pawimawh a tul a, damdawiin bawlhhlawh te chu dahna mumal tak nei a bawlhhlawh dang te nen in chawhpawlh theilo tura kan sawngbawl a tul a ni, a ti. 

Biomedical Waste Management Rules, 2016 Dan hi Lunglei khawpuiah kalpui thuai a nih theihna atan sawrkar damdawiin, private damdawiin, leh clicnic hrang hrang te, AH&Vety damdawiin leh tlawmngai pawl hrang hrang aiawhte leh State Pollution Control Board hotute nen vawiin program-ah hian hmalak dan tur sawihoin UD&PA hotute chuan mipuite hriselna kawnga rahbi pawimawh tak a ni dawn a ni, an ti.

Pu Eddie Zonunkima, SDS, UD&PA Department pawhin thu sawiin Biomedical Waste Management Rules, 2016 hnuaiah chuan natna enfiahna hmanrua, damlo enkawlna, ran leh mihring vaccine pek na leh natna zirchianna hmuna atanga bawlhhlawh lo chhuak te chu Biomedical Waste vek an ni a, mihring hriselna atan an hlauhawm theih avangin fimkhur taka thliar hran leh sawngbawl a tul a ni, a ti. Biomedical waste bawlhhlawh tichhuak tu leh sawngbawl tu ten State Pollution Control Board atangin phalna an dil a ngaih thu a sawi bawk.

Pi PC Lalmuanpuii, AEE Mizoram Pollution Control Board chuan biomedical waste hrang hrang ten Environment leh mipuiah nghawng tlem thei ang ber a neih theih nan Biomedical Waste Management Rules, 2016 chu duan chhuah a nih thu kalkhawmte a hrilh a.  Biomedical waste- te hi natna thehdarh tu an nih theih avangin damdawiin leh clinic zawng zawngin an zawm a tul a, a zawmlo tu te chu Dan anga hrem an nih theih thu a sawi bawk.

Vawiin programme ah hian sawrkar leh private damdawiin aiawhte bakah tlawmngai pawl leh khawtlang hruaitute an kal tha hle a. Sawrkar hotute leh mithiamten thu an sawi hnu ah hian zawhna leh chhanna hun hman a ni bawk

 

Written by C. Lalremruati, MIS, DIPRO Lunglei DATED: 11th August 2017, 5:08 PM | LANGUAGE: MIZO