Site Last Updated: 23rd June 2018, 3:42 PM

MEDIA WORKSHOP ON CLIMATE CHANGE REPORTING BUATSAIH

Swiss Agency for Development and Cooperation (SDC) hnuaia Indian Himalayas Climate Adaptation Programme (IHCAP); Department of Science and Technology, Government of India; Mizoram State Climate Change Cell, Mizoram Science, Technology and Innovation Council (MISTIC), Government of Mizoram leh Centre for Media Studies (CMS) te bultumin vawiin khan Aijal Club-ah ni thum awh tur ‘Media Workshop on Climate Change Reporting’ chu neih a ni a. Governor Lt. Gen. Nirbhay Sharma PVSM, UYSM, AVSM, VSM (Retd.) chu Khuallian niin, ‘Media manual of IHCAP’ a tlangzarh nghal a ni. 

Governor chuan sik leh sa inthlak chungchang hi kum tam tak kalta atangin kan hre tawh thin a, mi tam zawk chuan min nghawng phak pawh kan ring lo thin a ni, a ti a. Khawvel lum chho zel avangin Himalaya tlanga vurte a tuiral chak tial tial a, tuifinriat tui chim chin a sang chho in, ruahsur dan te pawh a mumal tawh lo a ni, a ti. Mizoramah pawh sik leh sa inthlak danglam avangin ruahsur hun chhung a seiin ruahtui pawh a tam tial tial a ni, a ti a. Tui tlan turah harsatna kan tawk a, kan thlai chin ten an chhiatpui a, natna hrik a pungin, mipui kan hrisel tur angin kan hrisel theilo a ni, a ti. ‘Save Chite Lui’ chungchang sawiin, hmundangah chuan lui humhalh hi sawrkar tih vek turah an dah a, kan ramah chuan khawtlang an inlungrualin, an thawhhona a tha a ti a. Ramdangte entawn tlak ni tur leh a hlawhtlin nan mipui thlawpna a dil a ni. Awareness siam chungchangah chanchinbumiten mawhphurhna lian tak an nei a ni tiin, workshop atanga an zir leh hriat te chu chhawr tangkai ngei turin duhsakna a hlan a ni.   

Khualzahawm Pu Lalsawta, Minister for Planning (Science & Technology) pawhin sik leh sa inthlak avangin kumin January leh May inkarah boruak danglam tak a thlen thu a sawi a. February atanga ruah a la tlak chhunzawm thu sawiin, mi tam takin an eizawnna an hloh phah in, nunna hial an chan phah a ni, a ti. Heng thil thleng te hi mimal tute emaw tihsual avanga thleng a nilo a, kan zavaiin mawh kan phur a ni, a ti bawk. 

Pi Annu Anand, Head, Advocacy, CMS chuan ni thum chhunga workshop an neih dan tur a sawi a. Pi Shimpy Khurana, Communication Officer, IHCAP chuan IHCAP Program hmalakna te a tarlang a ni. Dr. RK Lallianthanga, Chief Scientific Officer-in lawmthu sawina in hun a khar bawk a ni.

Written by Vanlalmuana, MIS, PRO to Governor DATED: 13th September 2017, 2:35 PM | LANGUAGE: MIZO