Site Last Updated: 26th May 2018, 5:46 PM

MIZO THALAITE AUSTRALIA-AH

Mizoram Youth Commission Chairman Pu Joseph Lalhimpuia chuan vawiin chawhnu khan Pu B.Vanlalvawna, IFS Indian High Commission Australia-a Consul General hna chelh mek chu a chenna inah thingpui inpui in Mizo thalaite Ministry of External Affairs kaltlanga hamthatna an neih theih dan tur a sawipui.

He an inkawmna ah hian MYC Chairman chuan kum tin Mizo thalai lehkha thiam tam tak an chhuah thin thu leh an zavai tan sawrkar hna in a daihloh thu leh India ram hmun hrang hrang leh khawvel ram danga hna an thawh theih dan kawng zawn a duh thu a sawi a. Pu B. Vanlalvawna pawhin hei hi pawmpuiin, thalai an mahni ram pawna awm te an State tana an tangkai dan leh ram danga awm ten an chhungte hlawh an thawnte chu State tan hmanthatna a tlin thu tarlang in, tuna posting a neih na Australia-ah pawh Nurse mamawhna a san thu a sawi a. Hlawh a that thu leh a tul anga hma lo lak ve pawh a inhuam thu a sawi.

Joseph Lalhimpuia hian Mizo Nurse-te Australia a hna an thawh chu tha a tih thu sawiin hmalak nghal a in huam thu a sawi a. Australia a kal duh te tan IELTS leh Bridging Course an paltlang theih dan tur lo ngaihtuahpui turin Pu B.Vanlalvawna hi a sawm nghal a ni. Melborne-a Mizo naupang leh thalai awmte tana Mizo tawng an zirna tur atana sakhaw lam, Mizo thawnthu hrang hrang leh Mizo tawng lehkhabu thahnem tak pek an lo nih tawh chu Pu Vanlalvawna hian lawmawm a tih thu a sawi bawk.

Pu Vanlalvawna nena an inkawmna ah hian MYC Chairman hi Pu Lalhmunsanga Director, LESDE leh MYC Officer ten an tawiawm a ni.

Written by Emily Lalrinpuii, MIS, IPRO DATED: 12th January 2018, 4:57 PM | LANGUAGE: MIZO