Site Last Updated: 23rd June 2018, 3:42 PM

MIZORAM ASSEMBLY BUDGET SESSION HAWNNAAH GOVERNOR-IN THU A SAWI

Vawiin chawhma khan Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) chuan Mizoram Legislative Assembly Budget Session hawnnaah thu sawiin, kan rama hmasawnna hmuh theia awmte chu ngawrh taka thawh chhunzawm zel turin member-te a sawm a ni.

Governor chuan kum liamtaa furpui chu Mizorama furpui rei ber a nih thu sawiin, ruahtui tlak nasat avanga khuarel chhiatna tuartute chhawmdawl tura sawrkar  hmalakna chu fakawm a tih thu a sawi a ni. Sawrkar hmalakna leh hmachhawp hrang hrang te a hnuai ami ang hian a tarlang a ni –

Central Sector Mission 5 – Swachh Bharat Mission (Urban), National Urban Livelihood Mission (NULM), Atal Mission for Rejuvenation and Urban Transformation (AMRUT), Housing for All (Urban) leh Smart Cities Mission te chu kalpui mek a ni a. November ni 29, 2017 khan India ram President Pu Ram Nath Kovind chuan Basic Services to Urban Poor (BSUP) hnuaia chenna In sak te chu a hawng a ni.

NLUP avangin kum 6 kalta chhung khan Mizoramah tlangrama thlawhhma lak 31.37% in a tlakhniam phah.

NITI Aayog-in a vawikhatna atana Health Index a siamah Mizoram chu state lian lo (small state) zingah pakhatna a ni. Global Adult Tobacco Survey 2 chuan Mizoramah puitling zuk leh hmuam ti 67.2% atangin 58.7%-ah a tlahniam a ti.

Tuirial Hydro Electric Project chu sawrkar kum kal laia zawh fel hman beisei a ni. 210 MW Tuivai Hydro Electric Project siam turin sawrkar chuan NEEPCO thawhhona thuthlung a ziahpui a ni.

District pali - Aizawl, Champhai, Kolasib leh Serchhip te chu pawna inthiar awmlohna, Open Defecation Free-a puan an ni tawh a, Siaha leh Mamit-ah endik hna kalpui mek niin, Lunglei leh Lawngtlai te pawh March thla tawpa puan hman beisei an ni.

Kum 2017-18 chhung khan godown 17 sak a ni a. NABARD loan hmanga godwon 27 sak belh tum a ni. Furpui laia buhfai a harsat loh nan Supply Center 47-ah buhfai chhek khawl a ni.

Serchhipah Educational Complex leh Lungleiah Education Guest House cum Training Centre te sak zawh tawh an ni. Aizawla Education Centre sak mek chu kumin 2018 zawh hman beisei a ni.

Mizoram chu hmarchhak biala RUSA kalpui tha ber leh India rampum huapa kalpui tha berte zing ami a ni. Lunglei Pukpuia Mizoram Engineering College sak hna chu March thla tawpa zawh hman beisei a ni.

Kum 2017-18 academic session atangin Mizoram sawrkar chuan pawl ruk chin chunglam zirtirnan English hman nise tiin thuthlukna a siam.

Mitdel (Visual Impairment) leh bengngawng (Hearing Impairment) te tan Rehabilitation Council of India (RCI) chuan B.Ed Special Education SCERT-ah hawn a remti a, India rama phalna a pek awmchhun a ni.

Kum 2017-18 chhung khan km 62.63-a thui formation cutting leh km 118.72-a thui kawngpui blacktop hna thawh a ni a. Km 580.98-a thui kawngpui 42 te chu siam mek an ni. PWD te’n km 1465.938-a thui National Highway sawmpakhat (11) an enkawl a. Project lian 22 an thawk mek bawk.

Sawrkar laipui sum senga ST Girls Hostel 13 sak tur zinga Hostel 12 te chu sak zawh tawh an ni.

MLPC Act, 2014 chu January ni 15, 2015 khan hman tan a ni a. Kumina chhiah hmuh zat chu cheng vbch 53 chuang a tling tawh a ni.

Autonomous District Council pathum huamchhungah zirna tihchangtlung nan school building 49 sa tura ruahman a ni a. Chung zinga building 20 te chu sak zawh tawh an ni. National Health Mission, SUBHAGYA hnuaia kawlpetha pekchhuah (electrification) leh digital connectivity hna te chu thawh mek zel a ni.

Academic session thar 2018-19 atangin Sainik School Chhingchhipah hmeichhe naupangte luhtir an ni tawh dawn.

February 16, 2018 thleng khan infiammite’n international level-ah gold 24, silver 13 leh bronze medal 8, national level-ah gold 40, silver 28 leh bronze 46 leh regional level-ah gold 16, silver 13 leh bronze medal 30 an dawng a ni.

Sawrkar chuan nikum 2016-17 chhung khan revenue cheng nuai 31,465.01 a hmu a. Kumin 2017-18 January thla thleng khan cheng nuai 27,176.91 a hmu tawh a ni.

October 2017 thleng khan Mizoram State Rural Livelihood Mission (MzSRLM) hnuaiah khaw 190-a Village Council 234 te chu tuam an ni a. Deen Dayal Upadhyaya Grameen Kaushalya Yojana (DDU-GKY) hnuaiah kum 2016-19 chhungin thalai 4668 hnenah skill training pek tum a ni bawk. NEDP hnuaia Chief Minster’s Rural Housing Scheme-ah beneficiary tinte cheng 50,000-a tanpui an ni bawk.

Mizo puan chi hrang hrangte dan hmanga humhalh an nih theih nan geographical indication (GI) leh patent tura hma lak mek a ni.

Tourism chawikang turin project pahnih – Swadesh Darshan-Northeast Circuilt hnuaiah Integrated Development of New Eco-Tourism Destination leh Eco Circuit Theme of Swadesh Darshan hnuaiah Development of Eco-Adventure Circuit te chu kalpui mek an ni. Champhai district-a khaw paruk (6) ah Homestay hawn a ni bawk.

Digital Classroom School 20-ah siam a ni.

Champhai leh Serchhip ah ITI thar sak mek a ni a, Kolasibah pawh thawh tan tep a ni.

NLUP-NEDP Convergence hnuaiah NLUP beneficiary mi 16000 tanpui an ni. UN Global Environment Facility (GEF) Project hnuaiah Mizoram chu State thlanchhuah pangnga zingah telh a ni.

Kum 2015-16 khan Mizoram per capita Net State Domestic Product chu Rs. 114524 a ni.

Governor chuan hmasawnna hna chu thawh chhunzawm zel turin a chah a. Mipui huapzo hmasawnna, eizawnna siamsak, inkalpawhna tha leh nundan hrisel zawk te chu ngaih pawimawh ber an nih thu a sawi a ni. Legislative Assembly member-te chu an mawhphurhnate hre thar leh a mipui tana thawk zel turin a sawm a. Sum inrenchemna kalpuia (financial propriety), langtlang tak (transparency) leh an thuthlukna siamah mawhphurhna la (accountable) turin a chah a ni. Sawihona hlawhtling tak an neih theih nan duhsakna a hlan bawk a ni.

For official Budget Address of the Hon’ble Governor  kindly see link https://dipr.mizoram.gov.in/speeches

Written by Vanlalmuana, MIS, PRO to Governor DATED: 13th March 2018, 11:54 AM | LANGUAGE: MIZO