Site Last Updated: 27th July 2017, 8:04 PM

NEDP RUAHMANNA HNUAIA SUMDAWNNA AWMZE NEI ZAWK A KALPUI ANIH THEIHNA TUR PROGRAMME “MIZORAM KAILAWN” A TAKIN KALPUI TAN A NI DAWN TA

Planning Minister Pu Lalsawta’n naktuk July ni 18, 2017 hian I&PR Auditorium, Aizawl-ah Mizoram State Entrepreneurship Development Monitoring Committee (MEDMOC), Government of Mizoram leh IIM Calcutta Innovation park (IIMCIP) tang dun hmalakna pawimawh tak, Mizoram-a awmze nei zawk leh zau zawka sumdawnna kalpui anih theihna tur programme “Mizoram Kailawn” chu a hawng dawn a, he programme hnuaiah hian a vawikhatna atan Mizoramah Business Plan Contest leh Entrepreneurship Summit neih a ni ang.

Mizoram sawrkar chuan Entrepreneurship lama hmasawnna chuan thalaite eizawnna kawng thar leh tha zawk athlen thei ani tih hria in New economic development Policy hnuaiah  Mizoram State Entrepreneurship Development Monitoring Committee (MEDMOC) a din a, MEDMOC chuan Entrepreneurship lama tui thalaite tan kawng a hawn sak dawn bakah an bul tanna tur thlengin a ngaihtuahsak dawn a, “Mizoram Kailawn” kaltlang hian Mizoram chhung ngeiah entrepreneurship hmasawn tir a tum a ni.

MEDMOC hi 25.10.2016 khan NEDP hnuaiah din a ni a, a tum ber chu Entrepreneurship development Scheme (EDS) kalpui niin Chief Secretary kaihhruaina hnuaiah Planning & Programme Implementation Department, Commerce & Industries Department leh Higher&Technical Department hotute an tel a, non-official expert member 3 an tel bawk a ni.

MEDMOC thawhpui  IIM Calcutta Innovation park (IIMCIP) hi India rama Management zirna  IIM-Calcutta hnuaia awm a ni a, India ram hmun hrang hranga entrepreneurship hmasawnna atana hmlatu ber niin India hmarchhak ah nasa takin hma a la mek a, Mizoram University leh tualchhung entrepreneur te nen kum 2 kalta atang khan hma lo la ho tawhin India ram chhunga State sawrkar hrang hrangte a lo thawhpui tawh a ni.

Natuka “Mizoram Kailawn” hawnna neih anih zawh hian IIM, Calcutta atanga mithiam lo kal te leh chanchinbumite’n inkawmhona an nei ang.

Written by Andrew H. Lalremruata MIS, IPRO & Media Officer, NIB DATED: 17th July 2017, 1:39 PM | LANGUAGE: MIZO