Site Last Updated: 26th May 2018, 5:46 PM

PU KS THANGA'N PZP CONFERENCE HMANPUI

Pang Zirlai Pawl (PZP) General Conference vawi 32-na Bungtlang 'S'-a nghah chu nimin khan Agriculture Minister Pu KS Thanga'n a hmanpui.

Pu KS Thanga chuan conference puala chanchinbu an siam "CHIALTINMAWII" tih chu a tlangzarh a. Mizoram chhunga hnam hrang hrangte kan inchhun khawmna chu 'Mizo'-ah a nih thu sawiin, khawi hmunah pawh awm i la, Mizo kan nihna hi kan chhuang fo tur a ni, a ti a. Mizo hnam hrang hrangte hi a bil te tea kan inlak hran zel chuan kan ral thuai dawn a ni, a ti. Pu KS Thanga chuan sawrkar inrelbawlnaah Secretary level-ah te, Deputy Commissioner level-ah te Mizo ngei awm se tia ram roreltute ngenna chu zahawm viau thin mah se, Mizo zinga thalai lehkhathiamte'n kan daih lo va; All India Service lama lut thei turin tuna zirlaite hian tan an lak nasat a ngai hle a ni, a ti a. Mizoram tiropui tur chuan thiamna tak tak a pawimawh thu sawiin, ram tana thahnem ngai a, thiamna sang zawk neih tuma theih tawp chhuah turin zirlai kal khawmte chu a chah a ni.

Pang Zirlai pawl General Conference vawi 32-na hi Bungtlang 'S' khelmuala pandal an sak 'Sihtlang Run'-ah neih a ni a. January ni 10 (nilaini) zan kha palai thlen kim leh palai lawmna hun atan hman niin, nimin khan Khuallian neia programme hman a ni.

Nimina inkhawm hi PZP Vice President K. Lalremkima chuan a kaihruai a. Zaithiam zai te ngaihthlak niin, Pang hnam lam hmuhnawm tak tak thlir ho a ni bawk. He Conference hi Mizorama zirlai pawl hrang hrang - MZP, MSU leh LSA bakah, MZP Churachandpur atang te'n an hmanpui hlawm a. MZP President L. Ramdinmawia, MSU President RB Lalmalsawma leh PZP President Herbert Ramengmawia te'n thu an sawi bakah, Pang zirlai ti thate chawimawina thuziak buatsaih chu Khuallian chuan a sem bawk a ni.

He conference thupui atan hian "Zirlaite hi hnam innghahna an ni" tih hman a ni a. Tun dinhmunah Pang Zirlai Pawl hian Chamdurtlangah headquarters an nei mek a. Sub-hqtrs 4 - Lunglei, Bangladesh, Damdep leh Chawngte 'P'-ah te neiin, unit 12 an nei mek a. Joint-Hqtrs hi Aizawlah din a ni bawk.

Written by C.Lalhruaitluanga, MIS, DIPRO Lawngtlai DATED: 12th January 2018, 4:47 PM | LANGUAGE: MIZO