Site Last Updated: 17th October 2017, 4:11 PM

PU LAL THANZARA’N LUNGLEIA MPL SEASON 6 KHELH MEK A HMANPUI

Vawiin khan a vawikhat nan Thuamluaia Mual, Lunglei-ah Mizoram Premier League khelh a ni a. Health Minister leh Mizoram Football Association (MFA) President ni bawk Pu Lal Thanzara chuan a hmanpui.

Vawiin hian match hnih khelh niin match hnihna inkhelh tan hmain inkhawm tawi neih a ni a. He hunah hian MFA President Pu Lal Thanzara chuan nikum lamah MPL-5 hlawhtling taka Champhaia khelh a nih hnuah MPL-6, Round 8 Lungleia khelh theih ani chu lawmawm a tih thu sawiin Mizoram Football Association, Lunglei District Football Association, leh Lunglei District Sports Committee te thawhhona leh hmalakna chu fakawm a tih thu a sawi a. Sawrkar hmalakna chak tak zarah MFA chuan nasa takin hma an sawn chho zel a ni tiin Minister chuan hun lo kal zel turah Mizoram hmun hrang hrang ah MPL khelh zel an tum thu kalkhawmte a hrilh a. Tun hnaiah Mizoram-in football inelna hrang hrang ah hlawhtlinna kan chang chho zel a, tun dinhmunah India football team Age Category hrang hrang ah Mizo tel lohna a awmlo a ni tih a tarlang a. (Under 15 – player 5, Under 17 – player 1, Under 19 – player 7, Under 23 – player 6, Senior – player 4).

Grassroot football chungchang pawh sawiin Pu Lal Thanzara chuan Mizoram hi India ramah a bul tantu kan ni a, MFA bultumin SSA leh Tata Trust ten grassroot football center 60-ah an kalpui mek bakah center din belh zel turin ruahmanna siam mek a ni, a ti a.  Football lama hmalakna thar pawimawh tak  MFA leh 8one Foundation tangkawp buatsaih Young Legend League Under 12, Under 10 leh Under 8 te tana league chu Champhaiah November thla a tan a nih tur thu a sawi a. Tata Trust, Mizoram sawrkar leh MFA- te hmalaknain Mualpui-ah Football Academy tan thuai a nih tur thu Minister chuan a tarlang bawk. Football hmasawn zel nana nasa tak hma la thin tu District hrang hrang Football Association leh Football Club-te hnenah MFA President chuan lawmthu a sawi bawk.

Written by C. Lalremruati MIS, DIPRO Lunglei DATED: 12th October 2017, 4:25 PM | LANGUAGE: MIZO