Site Last Updated: 26th May 2018, 5:46 PM

PU PC ZORAM SANGLIANA'N SPECIAL HANDLOOM EXPO-2018 A HAWNG

MIFCO Chairman leh Kolasib bialtu MLA ni bawk Pu PC Zoram Sangliana chuan vawiin khan Kolasib Diakkawn a Brig. C.Vankunga Shopping Centre Conference Hall ah Kolasib Special Handloom Expo-2018 chu khuallian niin a hawng.

Hawnna inkhawmah hian khuallian chuan thu sawiin mahni hnam ziarang, incheina leh hnam kalphung hrelo chu hnam ropui an awm theilo a, hnam boralna zawk a ni a ti a. Ram leh Hnam humhalh kan puanga kan buaipui na kawnga thil pawimawh tak chu mahni hnam kalphung leh ziarang te vawng nunga chawi lar zel hi a ni tiin chu chuan hnam chimral nihna laka min humhimtu pawimawh tak ani ang a ti.

Khuallian chuan mahni hnam thil dehchhuah leh ziarang te chu a neitu nihna hauh a pawimawh thu sawiin hnam dang ina kan hnam ziarang tidal theia min entawn loh nan a neitu nihna hauh tlat a tul thu a sawi a, tun dinhmunah Mizo Puanchei leh mizo hmarcha te chu a neitu nihna kan hauh a, hemi bakah hian thil hrang hrang deuhchhuah te pawh a neitu nihna hauhna kawnga tan lak a ngaih thu a tarlang bawk a ni.

Pu PC Zoram Sangliana chuan Mizo hmeichhiate kut themthiamna chuan Mizo hnam ziarang leh inthuamna te chu khawvel hmun hrang hanga Mizote min pholang tu leh min chawimawitu a ni tih sawiin Kum 2010 Common wealth Games ah pawh Indian Contingents te chu Infiamna tualzawlah Mizo Hmeichhe Incheina leh Mizo Lam hmanga hruailuh annih thu a tarlang a, chu chuan Mizo Culture zahpuiawm loh zia nasa takin a tarlang a ni a ti. "Mahni fate tana hnam incheina lei phallo khawpa uikawm Nu leh Pa kan awm ang tih a hlauhawm" tiin Mizo nih zahpui loa hnam incheina leh ziarang te vawng nunga chawilar sauh sauh turin kalkhawm mipuite chu a sawm a, hemi atan hian Chhungtin a Nu leh Pa te hmalakna bakah Social media leh Media hrang hrangte hman tangkai a pawimawh thu a sawi bawk a ni.

Khuallian chuan Mizote Kut pawimawh berte zinga mi Chapchar kut hma ngeia Special Handloom Expo buatsaih theih ani chu lawmawm tiin Chapchar Kut ni a Mizo taka kan inthuam theuh theihnan Handloom Expo chu hmang tangkai turin mipuite a sawm a ni.

He hun hi Pi Lalthlamuani, Vice President, Hqrs MHIP chu khualzahawm niin a hmanpui ve bawk a, Pi Lalthlamuani chuan Mizo hmeichhiate kut themthiamna chu Mizo Mipa te pawhin hlawkpui in Puan tah buaipui na chang an hre chho chu a hlu a ni tiin hei hian Hnam incheinate chawilar na kawngah a tangkai hle dawn ani a ti.

Special Handlloom Expo hi Sawrkar Laipui a Ministry of Textiles sponsor niin Mizoram Sawrkar hnuaia Commerce & Industries Department kaltlanga buatsaih a ni a, MAHCO chu Implementing Agency a tan ruat an ni a. Special Handloom Expo hi Mizoram ah hmun 3 (Aizawl, kolasib leh Champhai) a buatsaih turin rawtna thehluh a ni a, tun dinhmunah hmun 2 a tan phalna chu pek tawh a nih thu tarlan a ni. Kolasib Special Handloom Expo ah hian CoOperative Society te ina Mizo Hnam incheina chi hrang hrang an zawrh chhuahna dawr 21 a awm a,  ni 4 hun chhung awh tur niin February ni 16 khian khar a ni ang.

Hawnna inkhawm hi Dr.Zohmangaiha, IRS (Rtd), MAHCO Chairman in a kaihruaia, tlawmngai pawl hruaitute leh mipui an tel tha hle a ni.

Written by Collin Hlychho, MIS, DIPRO Kolasib DATED: 13th February 2018, 4:09 PM | LANGUAGE: MIZO