Site Last Updated: 23rd September 2017, 1:56 PM

SERCHHIP KHAWPUI ODF AH INPUANG

Vawiin hian Serchhip District Sanitation Task Force chu an Chiarman Pi Sangchhin Chinzah, District Bawrhsap ni bawk hovin an thukhawm a, Serchhip khawpui chu pawnlera inthiar awm lohna khawpui (Open Defecation Free Town) ah Pi Sangchhin Chinzah hian a puang.

Serchhip khawpui Open Defecation Free Town anih theih nan hian hun rei tak kalta atang khan hmalak a ni a, tun August thla tir lam khan Town chhunga Ward/ village hrang hrang ten an veng theuh chu ODF veng anih thu Declaration an siam kim thei ta a. Chumi anih avang chuan August ni 22, 2017 khan District Sanitation Task Force chuan Temporary ODF ah Serchhip chu puangin, sawisel duh neite tana sawiselna hun ni 15 chhung a hawng zui a. He hun hawn chhung hian ngaihtuah zui ngai tham sawiselna (Substantial Objection) a awm loh avangin vawiina thukhawm chuan thu tlukna siamin Serchhip chu ODF Town ah puangin, Chairman Pi Sangchhin Chinzah hian ODF Town a puanna hming a ziak nghal a ni. ODF a Serchhip an inpuanna hi State thuneitute hnenah thlen leh tur a ni a, State in Central thuneitute lamah thlen leh in ni 30 chhungin third party verification team an rawn tir leh dawn a ni.

Vawiina thukhawm te hian District khawpui intihsiakna kal meka hmalak dan tur ruahmanna an lo siam tawhte bawhzui dan thlirletna an hmang bawk a, village council tinte hmalak dan hrang hrangte ngaih thlak a nih bakah NEDP Climate Change, Adaptation and Mitigation hnuaia urban stream tihfaina tur ruahmanna hmalak zui dan tur an rel bawk. He hmalakna hnuaiah hian khawpui thli luanna kawr pawimawh pahnih, Sesah lui leh Hmar Veng lui/ Hmawngawn lui thenfai an rel a. A thawh hun tur chu a hrana la sawi leh tur a ni ang.

Vawiina meeting hian kan hma lawk October 2-9 inkara Claenliness Week, 2017 lo thleng tur hman dan tur an rel bawk a. Cleanliness Week hi a hawnna inkhawm October ni 2, zing dar 7:00 ah Serchhip Bazar ah neih a ni ang a, zing dar 6:00 ah Zirlai naupangten khaw chhungah Cleanliness Rally neiin, dar 7:00 ah Bazar ah Opening Function hmannaah an tel nghal ang. Week chhung hian veng tinte chu veng chhung tihfai hnatlang nei tura tih niin an thingpui in man pek an ni ang a, veng fai intihsiakna neih zui nghal a ni bawk ang. Lawmman chu October ni 9, 2017 a DC Conference Hall a Cleanliness Week kharna inkhawm ah pek an ni thung ang.

Vawiina meeting ah hian Serchhip SP, Pu Lalringdika, Pu Chuauhnuna, Addl. DC, Pu R. Vanrengpuia, SDO Sadar te leh DLAO, DUDO leh District Officer pawimawh dangte bakah Town chhunga Village Council hrang hrang aiawh te an tel a ni.

Written by K. Saitluanga MIS, DIPRO Serchhip DATED: 13th September 2017, 3:41 PM | LANGUAGE: MIZO