Site Last Updated: 23rd September 2017, 1:56 PM

SPORTS MINISTER IN HAWLA INDOOR STADIUM-AH OUTDOOR ARTIFICIAL ROCK CLIMBING WALL A HAWNG; MIZORAM STATE SPORTS COUNCIL ELECTION NEIH A NI BAWK

Vawiin khan Sports & Youth Services Minister chuan Hawla Indoor Stadium, Republic Vengthlangah feet 52 a sang Outdoor Artificial Rock Climbing Wall a hawng. Climbing Wall hawnna inkhawm buatsaihah hian Pu Hmingdailova Khiangte leh Pu R. Vanlalvena, MLA te chu khualzahawm an ni. 

Sports Minister chuan Sports Adventure lama tui mi te tan Rock Climbing Wall thar hawn a ni ta chu thu lawmawm tak a nih thu leh, hun reilo teah chuan he discipline-ah hian ram aiawh a chhuak thei mithiam tam tak chherchhuah an nih ngei a beisei thu a sawi. Infiamna discipline hrang hrangah Sorkar chuan hmunhma tha tak tak siam a hma la in, hengte hi thalaiten chhawr tangkai a thahnem an ngaih avangin infiamna khawvelah Mizoram chuan hma a sawn nasat phah thu a sawi a. Kum 2016-2017 financial year atanga vawiin ni thlengin infiamna hmunhma lian tham pakua (9) Mizoram hmung hrang hrangah hawn a nih tawh thu leh, hawn theih mai a peih tawh, a sum tumtu lamin installment an la pek kim loh avanga la hawn loh engemawzah a awm thu te a tarlang bawk a. Sports Minister chuan sports infrastructure tha siam leh tihchangtlun hna hi sorkar chuan a thawh chhunzawm zel tur thu sawiin, heng hmalakna zawng zawng hi a hlawhtlin famkimna erawh Sorkar kutah ni lovin sports association-te leh sports lama tui mite an nih thu a sawi a; chumi avang chuan tun aia nasa leh zual a Mizoramin hma a sawn theih nan leh mithiam tam zawk chherchhuah an nih theih nan tan la turin sports association hruaitute a sawm nghal a ni. 

Pu Hmingdailova Khiangte chuan Artificial Rock Climbing Wall thar chu rock-climbing lama tui mite leh tui tharten tangkai taka an hman a beisei thu leh, a hmangtu zawng zawngten neitu rilru pu a an enkawl leh hman tangkai a beisei thu a sawi a ni. Aizawl South-I bialtu MLA Pu R. Vanlalvena chuan Mizote chu talent tha tak nei, infiamna discipline thenkhatah phei chuan ram changkang leh hmasawn zawkte pawh  leh pel thei hial kan nihna te hre reng a, midang tluk lohna kan la neihte pawh chona thar ni tel bawk se tiin, thahnemngai taka hmasawnna kawng zawh zui zel turin infiammite a sawm a ni.

Outdoor Artificial Rock Climbing Wall, Hawla Indoor Stadium ami hi kum 2014-2015 chhung khan Special Plan Assistance (SPA) fund atangin Rs. 46,68,825 seng a sak a ni a. He hna thawk tur hian StepIn Adventure, North East Circle, Maharashtra (Pune) chu thlan a ni a, anni hian North East Region enkawltu hran an neih Pu David Zohmangaiha, Mount Everester enkawlna hnuaiah he Climbing Wall hi sak a ni.

Sports Climbing hi intihsiakna chi thum – Lead, Speed leh Bouldering-ah te then niin, heng category pathumah hian inel thin a ni a. Vawiina hawn tak Climbing Wall hi Lead leh Speed Climbing tur atana siam a ni. Climbing rope hi a fan thei chi hman a ni a, a fan avang hian a sawh a na lovin a him bik a, tuna hrui hman hian 2,500 kg a khai zo a ni. Climbing Competition hi kum 2020 Summer Olympic atangin telh a ni dawn nghe nghe a ni.

Vawiin Rock Climbing Wall hawnna inkhawm hi Pu H.L. Rochungnunga, IAS, Secretary, SYS chuan kaihruaiin, Pu James Lalramnghaka, Assistant Engineer, MSSC chuan hna sak dan report a pe a, hawnna inkhawm zawh hian Climbing Association of Mizoram ten demonstration an nei a ni.

Hemi zawh hian Mizoram State Sports Council chuan an Ex-Officio President, Sports Minister Pu Zodintluanga hovin General Body Meeting an nei chhunzawm a, hruaitu thlanna an nei bawk a. Vice President atan V. Lalzawmliana (Archery Association) leh Joint General Secretary atan Pu C. Lalrinzuala (Table Tennis Association)-te chu thlan tlin an ni a, Vice-President hi coin-toss a tling a ni.

Written by Emily Lalrinpuii, MIS, IPRO DATED: 13th September 2017, 3:35 PM | LANGUAGE: MIZO