Site Last Updated: 19th February 2018, 6:35 PM

STATE LEVEL PAINTING COMPETITION ON ENERGY CONSERVATION KHARNA HUN HMANG

Vawiin khan sorkar laipuia Bureau of Energy Efficiency (Ministry of Power), Mizoram sorkar leh North Eastern Electric Power Corporation (NEEPCO) tang hovin an buatsaih, State Level Painting Competition on Energy Conservation-2017 kharna hun Chaltlang YMA Hall-ah hman a ni a, P&E Department Secretary Pu H. Lalengmawia chuan Khuallian niin a hmanpui.

India rampuma Energy renchemna tura inzirtirna leh inhrilhhriatna atan State leh Union Territory zawng zawngah zirlai naupangte tan lemziaka intihsiakna hi kumtin 2005 atang khan neih thin a ni a, Mizoramah pawh North Eastern Electric Power Corporation (NEEPCO) chuan Mizoram chhunga zirlaite tan  Painting Competition hi kalpui a ni.

P&E Secretary Pu H. Lalengmawia chuan Painting Competition on Energy Conservation neih a ni chu naupangte talent haichhuahna atan leh energy renchemna kawnga zirtirna hmanraw tangkai tak a nih thu sawiin naupangte chu power renchem tura awareness kalpuinaah campaigner ni vek turin a sawm a. Solar energy dekchhuak tur leh hmang tangkai tura nasa taka hmalak a tul thu leh chhung tinin kan energy hman danah a heklo zawng leh kan hmanraw hman te pawh energy tiheklo chi  hman uar a tul thu a sawi bawk a. Naupangte chu hlawhtling tur chuan mahni inrintawkna a pawimawh tiin National Level Painting Competition on Energy Conservation neih leh turah duhsakna a hlan nghal a ni.

He hunah hian Pu Ajay Kumar, Senior Manager (HR) NEEPCO Ltd. chuan inlawmna thu a sawi a; lemziak endiktute aiawhin Pu Rozamliana Ralte hnen atangin thusawi tawi ngaihthlak niin; Dr.Pradeep Saikia, Deputy General Manager, NEEPCO chuan thu a sawi bawk a ni.

State Level Painting Competition on Energy Conservation- 2017 hi category A leh B-ah te neih a ni a. Category A hi Classes-IV, V leh VI-te tana neih niin, pakhatna chu Lalmuankimi, St. Maria Goretti School Kolasib niin, pahnihna- H.Lalnunfela, Radiant Heart School, Thingsulthliah leh pathumna-Lalhunngheti, Presbyterian English School, Diakkawn Kolasib te an ni a. Category-B hi Classes-VII,VIII,IX te tana buatsaih niin,pakhatna- Samuel Lallawmzuala,  Presbyterian English School, Kawlkulh, Pahnihna- Vanlalngaihsaka, Tuikhurhlu U.P.S leh pathumna- B. Lalnunmawia , Genesis English School, Bethlehem te an ni a. Consolation prize hi category tinah mi 10 hnenah theuh pek an ni bawk. Categry A-a lawmman 1,2 & 3 late hi Delhi ah National level competition-ah an tel anga, Category B atanga 1,2 & 3 te hi an lemziak thawm thlak a ni bawk ang.

Written by Christina Lalmuanzuali MIS, IPRO DATED: 14th November 2017, 4:29 PM | LANGUAGE: MIZO