Site Last Updated: 26th May 2018, 5:46 PM

STATE LEVEL ROAD SAFETY COUNCIL THUKHAWM

Vawiin chawhnu khan State Road Safety Council chuan an chairman Transport Minister Pu John Rotluangliana hovin a pisa –ah thukhawmna an nei a. 29th Road Safety Week hman dan tur an rel a ni.

Transport Minister Pu John Rotluangliana chuan Road Safety Week chu a hma aia nasa zawka mipui beng a thlen theih nan inhrilhhriatna neih a pawimawh thu a  sawi a. Lirthei chesual vanga chhiatna tihtlem a nih theih nan tan lak a tul thu a sawi bawk a ni.

Meeting-ah hian nikum lama Road Safety Week hman a nih dan thlirletna hun hman a ni a. Council chuan Mizoramah February Ni 12-18, 2018 chhungin  Road Safety Week neih tur tiin thu an rel a. He Week pual hian free medical check up, talk show bakah live phone-in programme leh a dangte neih tha tiin Meeting  chuan  a rel a. Inhrilhhriatna zau zawk neih a nih theih nan Sub-Committee din ni se tiin rel a ni a. Meeting-ah hian State Road Safety Council khaidingtu tur Lead Agency Chief Executive Officer tur ngaihtuah ni se tiin rel a ni bawk.

Meeting-ah hian Transport, Home, UD&PA, Finance, ICT, I&PR, Health & Family Welfare, School Education, Higher & Technical Education, Excise & Narcotics Department-te an tel a ni.

Written by Lalruatpuii Hnamte, MIS, IPRO DATED: 12th January 2018, 4:13 PM | LANGUAGE: MIZO