Site Last Updated: 21st September 2017, 5:49 PM

THISEN PEK HLUTZIA PUANDARHNA CAMPAIGN HEALTH MINISTER IN A HAWNG

Vawiin chawhnu khan Pachhunga University College Seminar Hall-ah Health Minister Pu Lal Thanzara'n 'midang te tana thisen pek hlutzia puandarh hna - Heroes Campaign', MSACS, AVBD, CARE, World Vision India leh  CZ foundation te tangkawpin an buatsaih chu a hawng.

Heroes Campaign hawngtu Health Minister Pu Lal Thanzara chuan tunlai khawvel thiamna sangber pawhin a tlukpui a siamchhuah theihloh khawpa hlu 'thisen' pekchhuah chu midangte tana nunna  chhanchhuahna hmanraw hluber zinga a mi a ni a.  Tunlai chhana pasaltha nih theihna kawng pawimawh tak a ni a ti a. Sum te, hausakna, lehkhathiam leh taksa pianphung mawina ringawtin a lei theih loh 'zahawmna leh midangte ngaihlut hlawhna'  te chu midangte tana inpekna thuk takin a thawkchhuak zawk thin a ni a ti. Thisen chu pek tam a ni poh leh nunna tam zawk chhanchhuahna a ni a ti a. Thisen pethei tur erawh chuan nun uluk leh hriselna kawnga taihmak a tul tih a sawi zau a. Health Minister chuan tun dinhmunah Health Department in a chhinchhiah HIV positive leh Aids vei mi sing chuang zet Mizoramah an awm tawh thu sawiin chhinchhiahloh enge maw zat an awm bawk avanga a luhaithlak tih a sawi a. 'Mizo thalai, tuna thisen la thianghlim te hian an nun an uluk a, hemi kawnga midangte an zirtir bawk chuan kan ziaawm chho ang a. Kan inthlahdah erawh chuan Mizoram mipui nuai sawm chuang awrh hi Aids/HIV natna tihbaiawm lakah hian kan tlawm mai ang tih a hlauhawm takzet  tawh a ni", a ti a. Thalai chhuanawm - Hero  tamzawk Mizoram in hmasawnna atan leh kawng engkimah a mamawh tih sawiin midang te tana  thisenhlu  pek kawngah te bakah  thiltha dang intihhmuh kawngah te kan zavai in kan intihhmuh zel a ngai a ni a ti.

Heroes Campaign hawnna inkhawmah hian PUC Principal Dr Tawnenga,  MSACS Project Director Dr.Lalmalsawmi Sailo leh Pu Zoramdinthara, Vice President, AVBD te pawhin thusawina hun an hmanga. MSACS hotute chuan 'midang te tana thisen pek hlutzia puandarh hna - Heroes Campaign' chu chhunzawm zel a nih tur thu sawiin thlaite zingah - Campaign Ambassadors(palaite) kaltlang  inzirtirna kalpui a ni anga. A remchan dan ang angin mipui vantlang hnenah  thla thum dana thisen pek chungchang bakah thisen pek hlutzia  te nasa zawka auchhuahpui chhunzawm a nih tur thu an sawi a ni.

 

Written by Malsawmsanga, MIS, IPRO DATED: 14th July 2017, 3:58 PM | LANGUAGE: MIZO