Site Last Updated: 23rd June 2018, 3:42 PM

TOURISM MINISTER IN RURAL HOMESTAY SCHEME HAWNG

Vawiin chawhnu khan Convention Centre, Berawtlang-ah Champhai District-a Tourism Department hmalakna Rural Homestay Scheme chu Tourism Minister, Pu John Rotluangliana chuan a hawng a. He hunah hian Champhai South Bialtu MLA Pu JH Rothuama, Tuichang Bialtu MLA Pu Lalrinliana Sailo, Champhai North Bialtu MLA Pu TT Zothansanga leh East Tuipui Bialtu MLA Pu T. Sangkunga te chu Khualzahawm niin Dy. Speaker, Pu R. Lalrinawma leh MLA Pu R.L. Pianmawia ten an telpui bawk a ni.

Khuallian Pu John Rotluangliana chuan thu sawiin Rural Homestay Scheme Champhai District-a buatsaih hi Mizorama a vawikhatna a ni tiin hetiang hmalakna neih a ni chu lawmawm a tih thu a sawi a. Homestay Partner-te (thlenna tur in neitute) hnenah chuan ‘Kan ram leh hnam darthlalang in ni’ tiin nagmahni ah khualzinten min hmuhdan a innghat a ni, a ti a. Minister chuan ei leh in thianghlim taka buatsaih leh inthiarnate tihfai that pawimawhna a tarlang a. Khawchhak lamah pipute sulhnu tam tak khualzinte hip thei tur a awm a, hei vang hian Rural Homestay Scheme atan pawh Champhai District thlan hmasak a ni, a ti a. In neitute hnenah chuan hnamdang mikhualte rilru zau tak pu chunga chhawn thiam a pawimawh a, hemi scheme hlawhtlinna pawh a bul tantu in nih angin in kutah a innghat thuk hle a ni, a ti bawk.

Pu J.H Rothuama chuan thu sawiin Mizorama la tih ngailoh Scheme thar kalpuina turin Champhai District thlan a ni chu lawmawm a tih thu a sawi a. Khualzinte thlenna tur hmun tha tak tak a awm tawh dawn a, thenkhat tan chuan hotel a thlen ai pawhin a zangkhai zawk dawn a ni, a ti. Pu Lalrinliana Sailo chuan Rural Housing Scheme chu hmalakna duhawm tak a nih thu sawiin hmun hrang hrang atangin champhai district-a pipute sulhnu tlawh an tam thu a sawi a. Khualzin mite tlawh theih tur hmunte a tarlang bawk a ni. Pu T.T Zothansanga chuan Mizorama a vawikhatna tur a nih angin a hlawhtlin leh hlawhtlin loh tuna a bul tantute ah hian a innghat nasa a ni, a ti a. Rural Housing Scheme chu hmalakna zawngchhang tlak tak a ni, a ti a. Felfai leh thianghlim taka enkawl a pawimawh thu a sawi bawk. Pu T. Sangkunga chuan Mizoram pawn atanga lo zin tam mahse thlenna tur an neih loh chuan kal nawn a chakawm tawh lo a ni, a ti a. Tourism Department in homestay partner-te tana training an buatsaih chu fakawm a tih thu a sawi a. Homestay scheme chungchang mipuite hnenah hrilhhriat that a pawimawh thu a sawi bawk a ni.

Programme hi Tourism Secretary Pi Esther Lalruatkimi, IRS chuan a kaihruai a, Tourism Department NEDP Nodal Officer Pi R. Lalrinchhani chuan report kimchang takin a pe a. Chawngtlai, Vaphai, Dungtlang, Hnahlan, Zokhawthar leh Vangchhia atanga Homestay Partner lo kalte atangin thu sawi ngaihthlak a ni a. Tourism Minister in Homestay Partnerte hi certificate leh homestay scheme an kalpuina tur 3rd installment a sem nghal a. Champhai DC Pu Lalngaihsaka, IAS chuan lawmthu sawina in hun a khar a ni. He hunah hian Tourism Department hnathawkte, khaw hrang hrang atanga homestay partnerte leh ICFAI zirtirtute leh zirlaite an tel a ni.

Rural Homestay Scheme hi zin veivakte tana Mizote nun zia a taka hriat theihna a ni a. NEDP 2016-2017 hnuaia Tourism Department hmalakna niin Champhai District-a khaw paruk- Chawngtlai (7), Dungtlang (5), Vangchhia (5),Vaphai (5), Hnahlan (6), Zokhawthar (7)-ahte hian chhungkaw 35 chu homestay partner atan thlan an ni a. Heng chhungkaw thlante hian an inah mikhual ten man chawia an thlenna tur room changtlung tak an siam a. Ei leh in tur pawh an thlenna ten an lo siam sak a nih loh pawhin anmahnia inbawl chawpna tur a awm dawn a ni. Chhungkaw tinte hi cheng nuai 2.29 theuh scheme atan hian pek an ni a. Foreign, domestic leh local tourist ten zokhaw nunphung leh hnathawh dante an tem ve theihna a ni a, hna leh thil dang vanga zin nikhua pawha thlen theihna tur a ni bawk. Homestay partnerte hi homestay nihphung leh kalphung, enkawl dan tur leh mikhual lo chhawn dan tur training pek an ni.

Khaw paruk thlan chhuahahte hian pipute sulhnu hlui en tur leh hmuh tur hrang hrang a awm a, homestay partner-te hi tour guide an ni nghal thei dawn a ni. Homestay hi Category A leh B a then niin thlen man mumal taka duan a ni a, Category A-ah hian zan khatah mi pakhat tan cheng 300 niin Category B-ah hian mi pakhat tan cheng 200 a ni a. Scheme hlawhtlinna tur hian Tourism Department chuan Implementing Committee dinin Champhai DC chu chairman niin Tourism Department Director chu Member Secretary a ni.

Written by Lalruatpuii Hnamte, MIS, IPRO DATED: 13th March 2018, 6:51 PM | LANGUAGE: MIZO