Site Last Updated: 26th May 2018, 5:46 PM

VICE CHAIRMAN NLUP IMPLEMENTING BOARD (NIB) HOVIN LUNGLEIAH PRESS MEET NEIH A NI

Vawiin khan Pu P.L. Thanga, IAS (Rtd) Member Secretary, State Planning Board leh Vice Chairman, NLUP Implementing Board ni bawk chuan Lungleia chanchinthar lakhawmtute Circuit House Conference Hall-ah kawmin Naktuk leh Naktipa NLUP Kut Lungleia hman tur chungchang a sawipui. Lunglei District MJA President Pu H. Lalthansanga hovin chanchinbu mi thahnem tak he Press Meet ah hian an tel.

He hun hi Lunglei DC Dr Ankita Chakravarty IAS in a kaihruai a, Pu PL Thanga chuan Mizoram sawrkar Flagship Programme NLUP, kum 8 lai kalpui tawhah a hlawhtlinna hrang hrang hmuh tur awm chu lawmawm a tih thu a sawi a. NLUP kalpui a nih hnuah Mizoram Per capita income chak taka a than mek bakah NLUP kalpui anih atangin a kum telin GSDP ah kan sang chho ta a, kum nga chhung zet chu tun thlengin India hmarchhak state te zingah a thang chak ber kan lo ni ta a ni a ti. Tun tumah, NLUP kalpui tan dawna Awareness Campaign neihna hmasa ber Lungleiah a Kut pui hman theih a lo ni dawn ta hi a lawmawm hle a ni a ti bawk. 

Ni 17 leh ni 18 May 2018 a NLUP Kutpui, Convention Centre a neih turah hian Line Dept. hrang hrang atangin Stall 20 siam a ni dawn a. Lunglei Dist. chhunga NLUP atanga thar chhuah Sangha, Coconut, Dry Chilly, Pickle, Thingpuife, Handloom and Handicraft, Puanthui leh thir chher lam thil, artui, Hmunphiah, Silk, Buhfai, Kurtai Sial sa leh thil dangte 20% a tlawmin zawrh chhuah a ni dawn a ni. NLUP hlawhtlinna phochhuak thei thlalak entirsiakna a awm bawk ang a, Eitur tuihnai tak tak zawrh chhuah a nih dawn bakah Civil Hospital Lungleia Doctor ten a thlawna inentirna an buatsaih dawn bawk a ni.

Written by C. Lalremruati MIS, DIPRO Lunglei DATED: 16th May 2018, 5:53 PM | LANGUAGE: MIZO