368/2024-2025 

Dated Siaha 26th April, 2024: Vawiin chawhma dar 11 khan 07- Chakhei Member of District  Council Constituency By-Election atan a hman tur Draft Electoral Rolls tahrik ni 1, April  2024  tehfung a hmang a buatsaih chu District Rural Resouce Centre, PD Office Building-ah tlangzarh a ni a, Pu M. Misael, Electoral Registration Officer leh Project Director (PD)  nibawk chuan he Draft Electoral Rolls hi a tlangzarh.

Pu M. Misael chuan political party aiawh lo kalkhawmte hnenah lawmthu sawina a nei hmasa a. Member of Parliament (LS) inthlanpui 2024 atan vote thlak zawhfel chiah a ni a, tunah by- election tura inbuatsaih a lo hun leh a, election officials leh political party lamte an hah tak zet tiin, theihtawp chhuah zel turin a ngen a. Democracy ramah chuan mipuiten an aiawh an thlan thin chu thil pawimawh tak a ni tih sawiin, inthlanna felfai leh thianghlim zawk a awm theih nan political party, NGO leh mipuite thawhpuiah a sawm a ni. Draft Electoral Rolls tlangzarh theih a ni chu lawmawm a tih thu sawiin, hun leh tha tam tak seng a roll buatsaihtute fakawm a tih thu a tarlangin hmalam hunah pawh theihtawp chhuah turin a chah nghal bawk.

Pu M. Misael chuan by- election atan roll revision uluk leh felfai taka tih a ngai a ti a. Kum 18 tling thar te roll a thun chu a pawimawh hle tiin, paih ngai leh thun thar tur  pawh uluk tak tih a ngai a, diklo leh felhlel awm lo turin roll revision- ah political party leh NGO chu thahnem ngai taka thawhpui turin a sawm a. MP (LS) inthlanpui neih zawh takah Siaha district chhungah  vote a tla chhe hle tih tarlangin, mipuite chu vote thlak lam a tan la thar turin a ngen a. A bik takin 07- Chakhei  bial mipuiten anmahni aiawh tur mi tha leh dik an thlanchhuah ngei theih nan duhsakna a hlan nghal a ni.

07- Chakhei bialtu  MDC nimek, Pu K. Hrahmo chu Member of Legislative Assembly (MLA) inthlanpui hnuhnung berah, 40- Palak Assembly Constituency atanga thlantlin a nih avangin MDC by- election hi neih a ni dawn a.  07- Chakhei MDC Constituency-ah hian khua pali- Chakhei, Chakheitla, Siasi leh Chheihlu an awm a. Vawiina tlangzarh tak Draft Electoral Rolls atanga a lan danin vote nei mipa-873  leh hmeichhia-897   awmin, vote nei zawng zawng hi mi- 1770   an awm mek.

Electoral Rolls- a hming thun thar/belh emaw hming paih emaw, a chhunga hming emaw kum emaw leh a dang dik lo tih dik duhte tan  tahrik ni 2, May, 2024 thleng  dilna thehluh theih a ni a, ni 14, May, 2024 hian Final Electoral Rolls hi tlangzarh tura ruahman a ni.

Vawiin Draft E/Roll tlangzarh tak hi Political party aiawh lo kalkhawmte hnenah Copy khat theuh Pu M. Misael, Electoral Registration Officer  chuan a hlan nghal.