433/2024-2025

Dated Serchhip, the 8^th May, 2024: Cricket Association of Mizoram hnuaia District te inelna 3rd Inter District Cricket Tournament a champion Serchhip District Cricket Association (DCA) team te lawmpuina leh chawimawina inkhawm vawiin chawhnu dar 2-a Serchhip DC Conference Hall-a neihah Serchhip DC Pu David Lalthantluanga chu khuallian a ni.

District Sports Committee Chairman ni bawk Pu David Lalthantluanga chuan Serchhip DCA chu pawl naupang te ni siin hun reilote chhungin hlawhtlinna ropui tak an chhar chu lawmawm a ti a, “Serchhip District mipui ten kan chhuang che u” tiin champion team te a lawmpui a ni. DC chuan cricket chu India rama sports lar ber a nih angin players te tan eizawnna tling a ni a, India team a tel pha tan phei chuan field chhung leh pawnah hausak pui lawihna tham game a ni tiin Mizo infiammi cricket a tui te chu tan la turin a fuih a. Serchhip District Cricket Association hruaituten sum leh pai, leh hmunhma infrastructure nei tha lo chungin theihtawp tak meuh an chhuah a, Mizoram District inelnaah Serchhip team-in champion dinhmun hial an luah thei chu lawmawm a tih thu sawiin players te chu an pawl hruaitute inpekna hre reng turin Pu David Lalthantluanga chuan a chah a ni.

Cricket Association of Mizoram hnuaia district te inelna 3rd Inter District Cricket Tournament chu April ni 23 – 27 inkar khan Champhai khawpuiah neih a ni a. Serchhip DCA chuan final ah Champhai DCA chu wicket 8 a hnehin a vawi khat nan an champion a ni.

Final match a half century siamtu Vanlalhruaia, Serchhip DCA chu ‘Man of the match’ atana thlan a ni a. Player of the tournament lawmman chu Suraj Singh, Serchhip DCA (132 runs & 9 wickets) chuan a dawng a, Hmingthanpuia, Serchhip DCA (9 wickets) chuan Best Bowler lawmman a dawng bawk a ni.

Vawiin programme hi Serchhip DCA President Pu HD Lalhmachhuana’n a kaihruai a. Serchhip Cricket Champion team leh coaching staff te hnenah lawmpuina pawisafai hlan an ni a. Serchhip District atanga Mizoram Cricket Team a tel pha mi pathumte hnenah chawimawina hlan a ni bawk.