305/2024-2025 

Champhai, the 19th April, 2024: Lok Sabha Inthlanpui, 2024 a Champhai District 25-East Tuipui Assembly Segment hnuaia 25/14 Vangchhia Polling Station-a security personnel duty, lungphuchawl avanga tukin dar 4:45 a boral Second India Reserve (IR) Battalion C/24 Lalrinpuia (28 yrs) S/o JMS Dawngliana, Kawlkulh Workshop Veng ruang chuan vawiin chawhma dar 10:50 khan Post Mortem Examination turin District Hospital Champhai a thleng a. Buaipui tulte zawhfel a nih hnu hian District Election Officer Pu James Lalrinchhana, Superintendent of Police Pu Vineet Kumar leh Official dangte'n ruang hi an thlah liam a ni.

Thlahna puala hun tawi District Hospital Champhaia buatsaihah District Election Officer Pu James Lalrinchhana chuan inthlan buaipui laia security personnel C/24 Lalrinpuia thih thu hriat a ni chu pawi a tih thu sawiin, khawhar chhungte a tawrhpui takzet thu a sawi a. Champhai District chhunga inthlanna buaipuitu vanduaina tawk ta chu district mipuite'n an hriat reng tawh tur thu a sawi a. Chhiat tawh dante Chief Electoral Officer hnena hriattir nghal thuai a nih thu sawiin, election duty laia thite ralna pawh a rang thei ang bera a chhungte'n an dawn theih nan buaipui thuai a nih tur thu a sawi bawk.

Thlahna thusawitu dang Champhai SP Pu Vineet Kumar chuan C/24 Lalrinpuia boral chu pawi a tih thu leh Police tana channa nasa tak a nih thu sawiin, Police tana a hnathawhte hriatreng a ni tawh ang, a ti a. A kalsan takte chu Police chhungkuaah chhiar tel zel an nih tawh tur thu a sawi bawk.

He hunah hian Pu Lalmalsawma Hnamte, Addl. SP in report tawi a pe a. Chhungkaw aiawhin Pu TBC Hruaizela'n thu a sawi a. District Election Office hminga ralna hmasa Rs 5,000/- chu Pu Lalrinawma, PD, DRDO & Nodal Officer, EEM in a hlan a ni.

Second IR Battalion C/24 Lalrinpuia hi April ni 8, 1996 ah piangin January ni 9, 2018 ah second IR Battalion a zawm a; kum 6, thla 3 leh ni 10 a service hman a ni.